Ligji kundër pastrimit të parave në lexim të dytë: Kuvendi mblidhet sot në orën 10:00

Ndryshimet në ligjin për parandalimin e pastrimit të parave dhe luftimin e financimit të terrorizmit rikthehen sot në sallën e Kuvendit të Kosovës, ku deputetët do t'i shqyrtojnë në lexim të dytë. Seanca plenare nis në orën 10:00.

Sipas njoftimit të Drejtorisë për Media dhe Marrëdhënie me Publikun të Kuvendit, bëhet fjalë për Projektligjin nr. 11/L-017, i cili ndryshon dhe plotëson Ligjin nr. 05/L-096. Ky shqyrtim është pika përmbyllëse e një rendi dite që hapet me miratimin e procesverbaleve nga seancat e mëparshme.

Para projektligjit, deputetët kanë për të vendosur për disa emërime në institucione kyçe. Kuvendi pritet të përzgjedhë dy anëtarë joekzekutivë të Bordit të Bankës Qendrore të Republikës së Kosovës, ndërsa për Radiotelevizionin e Kosovës do të formohet një Komision Ad-Hoc. Ky komision do të merret me përzgjedhjen e kandidatëve për katër vende në Bordin e RTK-së: dy anëtarë nga komuniteti shqiptar, një nga komuniteti serb dhe një nga komunitetet joshumicë.

Në rend dite është përfshirë edhe propozimi i Grupit Parlamentar të Listës Serbe për emërimin e deputetëve të saj në komisionet parlamentare.