Licencat e "Kosova A" dhe "Kosova B" skadojnë më 4 tetor, bordi i ZRRE-së pa kuorum

Më 4 tetor skadojnë licencat e termocentraleve "Kosova A" dhe "Kosova B", dy njësitë prodhuese që mbajnë pjesën dërrmuese të furnizimit me energji elektrike në vend. Problemi nuk është teknik, por institucional: organi që duhet të vendosë për vazhdimin e tyre, Bordi i Zyrës së Rregullatorit për Energji, nuk ka kuorum.

Zyra e Rregullatorit për Energji ka konfirmuar se, pa licenca aktive, Korporata Energjetike e Kosovës nuk ka bazë ligjore për të vazhduar prodhimin e energjisë.

Aplikimet për vazhdimin e licencave tashmë janë shqyrtuar nga stafi profesional i rregullatorit. Vendimi përfundimtar, megjithatë, nuk mund të merret pa u funksionalizuar Bordi, të cilit i mungojnë dy anëtarë dhe kryesuesi. Plotësimi i këtyre pozitave varet nga funksionalizimi i Kuvendit të Kosovës.

Ish-ministri i Tregtisë dhe Industrisë, Ismet Mulaj, në një prononcim për "Front Online", e ka lidhur ngërçin institucional drejtpërdrejt me sigurinë kombëtare. "Kjo tregon më së miri çfarë funksionaliteti kanë institucionet e vendit, çfarë probleme u sjellin jo vetëm kompanive e ndërmarrjeve publike, por edhe bizneseve private e sigurisë kombëtare, sepse energjia hyn në këtë çështje", ka deklaruar ai.

Sipas Mulajt, licencat duhej të ishin vazhduar edhe pa pritur formimin e organeve. "Vazhdimi i licencave sjell probleme jashtëzakonisht të mëdha Kosovës. Edhe nëse nuk formohen institucionet, siç është Kuvendi dhe bordi i ZRRE-së, në emër të sigurisë kombëtare në mënyrë automatike është dashur të vazhdohen", tha ai, duke shtuar: "Kjo tregon që problemet me funksionalizimin e institucioneve tona sjellin pasoja të pariparueshme për ekonominë e vendit."

Njohësi i energjetikës, Vezir Rexhepi, thekson se të dy termocentralet mund të operojnë vetëm nën rregullimin e ZRRE-së. "Termocentrali Kosova A dhe B, që janë në kuadër të Korporatës Energjetike të Kosovës, duhet ta marrin dhe ta kenë licencën, e cila çdo herë aprovohet prej ZRRE-së. Nuk mund të flas për aspektet ligjore, por ata duhet të operojnë vetëm në kuadër të ZRRE-së", ka deklaruar ai.

Rexhepi e ilustron peshën e çështjes me shifra: "KEK-u e furnizon Kosovën pothuajse me mbi 80 për qind të prodhimit të përgjithshëm. Ndikimet janë të jashtëzakonshme nëse ka probleme te furnizimet dhe është e rëndë." Sipas tij, pasojat nuk do të ndaleshin te konsumatorët familjarë: "Çështja e energjisë ka ndikim të jashtëzakonshëm, sepse të dy termocentralet e furnizojnë vendin dhe së fundmi edhe bizneset pas liberalizimit të tregut".

Ndërkohë, nuk dihet ende kur mund të plotësohen pozitat e zbrazëta në Bordin e ZRRE-së, pasi kjo mbetet e kushtëzuar nga funksionalizimi i Kuvendit.