Letrat me pluhur të bardhë arrijnë në Senat: në shënjestër edhe senatorë republikanë

Valës së letrave të dyshimta që po qarkullon nëpër Shtetet e Bashkuara i janë shtuar emra nga maja e politikës amerikane. Disa senatorë republikanë figurojnë tani mes shënjestrave, tha të premten një person me njohuri të drejtpërdrejta për hetimin, i cili foli për NBC News. Emrat e tyre nuk janë bërë publikë.

Këta ligjvënës i bashkohen një liste që po zgjatet çdo ditë: të paktën 25 zyra zgjedhore shtetërore dhe të paktën 10 zyra të demokratëve në Kongres. Gjashtë prej këtyre demokratëve janë senatorë, mes tyre edhe udhëheqësi i shumicës në Senat, Chuck Schumer nga Nju Jorku.

Senatorët demokratë Chris Murphy nga Konektikati, Alex Padilla nga Kalifornia, Lisa Blunt Rochester dhe Chris Coons nga Delaveri, si dhe Kirsten Gillibrand nga Nju Jorku, kanë raportuar se zyrat e tyre morën letra të dyshimta. Të premten, edhe katër anëtarë të Dhomës së Përfaqësuesve, Seth Moulton nga Masaçusetsi, Maxwell Frost nga Florida, Ritchie Torres nga Nju Jorku dhe Bonnie Watson Coleman nga Nju Xhersi, deklaruan se zyrat e tyre në shtetet ku janë zgjedhur kishin marrë letra të tilla.

Përmasat reale të fushatës mbeten të paqarta. Nuk dihet ende sa zyra janë goditur, por zyrtarët federalë duket se po i trajtojnë rastet si të lidhura me njëra-tjetrën. Sipas njërit prej burimeve të përfshira në hetim, janë dërguar në mbarë vendin "dhjetëra e dhjetëra" letra me të njëjtat karakteristika.

"Të gjithë janë të hutuar nga përmasat e kësaj, dhe askush nuk e di nga po vjen", tha një tjetër burim i njohur me hetimin. "Shumica e letrave u janë adresuar zyrave shtetërore, por disa edhe në D.C."

Hetimin e drejtojnë FBI dhe Shërbimi i Inspektimit Postar i SHBA-së. Sipas dy burimeve të njohura me çështjen, organet e zbatimit të ligjit nuk kanë arritur ende të gjurmojnë origjinën e saktë të letrave, as personin apo personat që qëndrojnë pas tyre. Shumica, në mos të gjitha letrat drejtuar senatorëve, u kapën para se të dorëzoheshin.

Lajmi më qetësues vjen nga testimet. Analizat paraprake në terren vazhduan gjatë gjithë natës dhe deri tani i gjithë pluhuri i testuar është gjykuar jo i rrezikshëm, sipas njërit prej burimeve. Ekzaminime të mëtejshme do të kryhen në laboratorët e organeve të ligjit.

Stafi i Senatit dhe i Dhomës së Përfaqësuesve kishte marrë të enjten njoftime paralajmëruese për pakot e dyshimta, ndërsa të mërkurën ishte raportuar se paketa të tilla kishin mbërritur në zyrat zgjedhore të Ohajos, Luizianës dhe Oklahomës. Deri të premten pasdite, lista u zgjerua me zyrat zgjedhore të Alabamës, Arizonës, Konektikatit, Delaverit, Xhorxhias, Idahos, Ilinoisit, Kansasit, Merilendit, Masaçusetsit, Nebraskës, Nju Hempshirit, Pensilvanisë, Karolinës së Jugut, Dakotës së Jugut, Tenesit, Uashingtonit dhe Uiskonsinit.