Le Monde Diplomatique tërheq postimin për dënimin e Thaçit dhe kërkon falje

Revista franceze Le Monde Diplomatique ka hequr nga Instagrami një postim për vendimin dënues të shkallës së parë ndaj Hashim Thaçit dhe ish-krerëve të tjerë të Ushtrisë Çlirimtare të Kosovës (UÇK), duke pranuar se publikimi përmbante pasaktësi dhe duke i kërkuar ndjesë Shoqatës së Studentëve Shqiptarë të Lionit.

Postimi ishte vendosur më 21 shtator 2026 dhe i referohej një artikulli të revistës të datës 18 shtator për dënimin e Thaçit. Në qendër të tij ishte një hartë e Kosovës me vendbanimet me shumicë serbe dhe manastiret ortodokse, e shoqëruar me një tekst sipas të cilit harta "tregon përmasën politike të këtyre krimeve".

Publikimi u kundërshtua nga një student, i cili paraqiti ankesë në Këshillin e Deontologjisë Gazetareske dhe të Ndërmjetësimit (CDJM) në Francë për shkelje të parimeve të saktësisë dhe vërtetësisë. Ai vuri në dukje se harta ishte e vitit 2023, ndërsa përdorej për të ilustruar ngjarjet e luftës në Kosovë të viteve 1998-1999. Sipas tij, kufijtë e sotëm komunalë dhe vendndodhjet e manastireve krijonin një pamje të gabuar të realitetit historik.

Ankesa shkonte më tej: kombinimi i hartës me pretendimin se UÇK-ja synonte të "nënshtronte popullsitë e konsideruara si të padëshirueshme", sipas ankuesit, u jepte krimeve një interpretim etno-fetar.

Më 28 shtator, CDJM-ja kërkoi sqarime nga drejtori i redaksisë së revistës dhe nga përgjegjësja për komunikimin dixhital. Përgjigjja mbërriti më 9 tetor dhe në të revista pranoi gabimet.

Përfaqësuesit e saj shpjeguan se harta ishte përdorur për të treguar ku jetojnë pakicat në Kosovë, por pranuan se ajo nuk mund të shërbente për të përcaktuar objektivat e krimeve të gjykuara. "Megjithatë, fjalia ‘harta tregon përmasën politike të këtyre krimeve’ i atribuon asaj një funksion që ajo nuk mund ta përmbushë: shpërndarja e pakicave dhe vendndodhja e manastireve që ajo paraqet nuk lejojnë të përcaktohen objektivat e krimeve të gjykuara", thuhet në përgjigjen e revistës.

Të njëjtën gjë revista e pranoi edhe për formulimin mbi synimin e pretenduar të UÇK-së, duke e cilësuar atë një përgjithësim të tepruar. "Shprehja ‘të nënshtronte popullsitë e konsideruara si të padëshirueshme’ çon në përgjithësimin abuziv mbi popullsi të tëra të shënjestrimit të personave të konsideruar si kundërshtarë të UÇK-së", shkruajnë përfaqësuesit e saj.

Përfundimi i tyre ishte i qartë: "Prandaj, vendosëm ta tërheqim këtë postim në Instagram dhe i kërkojmë ndjesë shoqatës ankuese për këtë publikim të cenuar nga gabime, të cilat do të përpiqemi që në të ardhmen të mos i përsërisim".