Kuvendi i Shqipërisë kundër vendimit të Hagës: agresori nuk barazohet me viktimën

Tetëdhjetë e një vjet burgim gjithsej për katër ish-krerë të Ushtrisë Çlirimtare të Kosovës. Ky është numri që ka shtyrë Kuvendin e Shqipërisë të dalë me një deklaratë të përbashkët pas aktgjykimit të Gjykatës Speciale në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit.

Kryetari i Kuvendit të Shqipërisë, Niko Peleshi, tha se një aktgjykim nuk mund ta rishkruajë historinë e një populli dhe as ta barazojë agresorin me viktimën. I njëjti qëndrim përshkon edhe tekstin e deklaratës, në të cilën Kuvendi shpreh indinjatën e thellë dhe mospajtimin e plotë me një vendim që e quan thellësisht të padrejtë ndaj katër ish-krerëve.

Në deklaratë theksohet se lufta e UÇK-së ishte luftë për lirinë dhe çlirimin e Kosovës, e lindur si përgjigje ndaj represionit sistematik, dhunës, spastrimit etnik dhe genocidit të kryer nga regjimi i Slobodan Milosheviçit. Sipas Kuvendit, asnjë aktgjykim nuk mund ta zhbëjë karakterin çlirimtar të asaj lufte.

Një pjesë e veçantë e dokumentit i kushtohet asaj që deputetët e cilësojnë si standarde të dyfishta në trajtimin e së kaluarës së rajonit: nderimet publike dhe shtetërore për persona të dënuar për krime lufte dhe glorifikimi i figurave të lidhura me gjenocidin dhe spastrimin etnik, përfshirë Ratko Mladiçin.

Kuvendi deklaron gjithashtu se qëndron kundër çdo përpjekjeje të Serbisë dhe Rusisë për ta instrumentalizuar politikisht procesin, për të relativizuar krimet e regjimit të Milosheviçit dhe për të delegjitimuar luftën çlirimtare, pavarësinë dhe shtetësinë e Kosovës. Në të njëjtën kohë kërkon që krimet e regjimit serb në Kosovë, përfshirë aktet gjenocidale, krimet e luftës dhe dhunën seksuale gjatë luftës, të denoncohen në të gjitha forumet ndërkombëtare.

Deklarata shpreh solidaritet të plotë me Kosovën, popullin dhe institucionet e saj, si dhe me Thaçin, Veselin, Selimin, Krasniqin dhe familjet e tyre, duke shprehur bindjen e palëkundur në pafajësinë e tyre. Sipas Kuvendit, ky aktgjykim nuk është fjala e fundit dhe pritet që të gjitha mjetet juridike dhe shkallët e mëtejshme të procesit të ndiqen deri në fund, me respektim të plotë të standardeve të procesit të rregullt ligjor.

Si hap konkret, Kuvendi i Shqipërisë njofton se do t'i koordinojë veprimet me Kuvendin e Kosovës dhe u bën thirrje dy qeverive të veprojnë së bashku, me qëllim korrigjimin e asaj që e quan padrejtësi, përmes rrugëve institucionale.