ReklamëHapësirë reklame
ReklamëHapësirë reklame
Reklamë
Kryetari i Kuvendit të Shqipërisë, Niko Peleshi, lexoi në parlament deklaratën që shpreh "indinjatën e thellë" ndaj vendimit për Thaçin, Veselin, Selimin dhe Krasniqin. Në Kosovë, pasojat e aktgjykimit vlerësohen si shumë më të gjera sesa përgjegjësia e katër të dënuarve.
"Një aktgjykim nuk mund të rishkruajë historinë e një populli." Me këtë fjali, lexuar nga foltorja e Kuvendit të Shqipërisë, parlamenti shqiptar hyri zyrtarisht në debatin për vendimin ndaj katër ish-krerëve të Ushtrisë Çlirimtare të Kosovës.
Kryetari i Kuvendit, Niko Peleshi, lexoi deklaratën në mbështetje të UÇK-së dhe të ish-pjesëtarëve të saj, në të cilën Kuvendi i Shqipërisë shpreh bindjen se lufta e UÇK-së ishte për lirinë dhe pavarësinë e Kosovës. "Kuvendi i Shqipërisë qëndron kundër përpjekjeve për të relativizuar krimet e Millosheviçit. E vërteta historike mbetet e palëkundur: UÇK luftoi për lirinë dhe pavarësinë e Kosovës. Kuvendi i Shqipërisë beson në pafajësinë e krerëve të UÇK-së", deklaroi Peleshi.
Në thelbin e tekstit qëndron kundërshtimi i drejtpërdrejtë i vendimit gjyqësor. "Kuvendi i Shqipërisë shpreh indinjatën e thellë dhe mosdakordësinë e plotë me një vendim që e konsideron thellësisht të padrejtë ndaj Hashim Thaçit, Kadri Veselit, Rexhep Selimit dhe Jakup Krasniqit", thuhet në deklaratë.
Deklarata vazhdon me një ripohim historik: "Kuvendi i Shqipërisë rithekson një të vërtetë historike që nuk mund të relativizohet: lufta e Ushtrisë Çlirimtare të Kosovës ishte luftë për lirinë dhe çlirimin e Kosovës. Ishte lufta e një populli për t'i dhënë fund represionit, dhunës dhe përndjekjes dhe për të fituar të drejtën për të jetuar të lirë në vendin e vet. Ajo lindi si përgjigje ndaj represionit sistematik, dhunës, spastrimit etnik dhe gjenocidit të kryer nga regjimi i Sllobodan Millosheviçit. Pa luftën dhe sakrificën e Ushtrisë Çlirimtare të Kosovës kundër pushtimit gjakatar serb, historia e çlirimit të Kosovës nuk mund të kuptohet. UÇK-ja ishte forcë vendimtare e rezistencës së popullit të Kosovës dhe e rrugës që çoi drejt çlirimit, lirisë dhe pavarësisë së saj. Hashim Thaçi, Kadri Veseli, Rexhep Selimi dhe Jakup Krasniqi janë të pandashëm nga kjo histori, nga lufta për çlirim dhe nga rrugëtimi i Kosovës drejt lirisë, pavarësisë dhe shtetësisë së saj."
Sipas tekstit të lexuar në Kuvend, një vendim gjyqësor "nuk mund të zhbëjë karakterin çlirimtar të luftës së Kosovës apo të barazojë agresorin me viktimën. Nuk mund të zhbëjë sakrificën e UÇK-së".
Deklarata përmban edhe një angazhim institucional: "Kuvendi i Shqipërisë angazhohet që të kërkojë drejtësi për viktimat e luftës në Kosovë, që të zbardhen krimet e luftës në Kosovë kundër popullit shqiptar, të koordinojmë veprimet me Kuvendin e Kosovës që të çojmë shqetësimet në rrugë institucionale."
Vendimi që e nxiti këtë reagim është i shkallës së parë. Katër ish-krerët e UÇK-së u shpallën fajtorë për katër akuza për krime lufte, ndërsa u liruan nga gjashtë akuzat për krime kundër njerëzimit.
Hulumtuesja e Tribunalit Penal Ndërkombëtar për ish-Jugosllavinë, Nevenka Tromp, ka vlerësuar se aktgjykimi i Dhomave të Specializuara ndaj Thaçit, Veselit, Selimit dhe Krasniqit ka pasoja që shkojnë përtej përgjegjësisë individuale të të dënuarve. Ajo veçoi konstatimin për ekzistencën e një "ndërmarrjeje të përbashkët kriminale", duke thënë se ky përfundim mund të ndikojë në mënyrën se si perceptohet lufta e UÇK-së dhe vetë shtetësia e Kosovës. Sipas Tromp, aktgjykimi mund të ketë efekt edhe në arenën ndërkombëtare, duke i dhënë Serbisë dhe vendeve skeptike më shumë hapësirë për të sfiduar legjitimitetin moral të luftës së Kosovës.
Tromp theksoi njëkohësisht se procesi i apelit mund të sjellë ndryshime, përfshirë ndryshimin e disa konstatimeve, uljen e dënimeve ose, në raste të caktuara, rrëzimin e shpalljes së fajësisë për pika të caktuara.
"Pasojat nuk kufizohen në Kosovë ose në Ballkanin Perëndimor. Drejtësia penale ndërkombëtare, si institucion, tashmë përballet me sulme të vazhdueshme retorike nga udhëheqës që janë subjekt i mekanizmave të saj gjetkë. Një çështje me vëmendje të madhe publike, në të cilën një tribunal i mbështetur nga Perëndimi, dhe i financuar nga BE-ja, prodhon një rezultat që një pjesë e konsiderueshme e opinionit të informuar e konsideron joproporcional, politikisht të leverdishëm ose strategjikisht të përshtatshëm për një aktor rajonal në raport me një tjetër, ofron pikërisht atë lloj shembulli mbi të cilin mbështeten argumente të tilla, pavarësisht bazës doktrinare të aktgjykimit individual. Ajo që vihet në lojë nga mënyra se si pranohet ky aktgjykim nuk është vetëm marrëdhënia e Kosovës me aleatët e saj, ose politika e brendshme e Serbisë, por besueshmëria më e gjerë dhe e ardhmja e të gjithë sistemit ndërkombëtar të përcaktimit të përgjegjësisë", thotë Tromp në një deklaratë për Radion Evropa e Lirë.
Ndërsa reagimet politike dhe juridike vijnë njëra pas tjetrës, verdikti është pritur si goditje edhe në familjet e dëshmorëve. Gazetarja Anita Haradinaj, bashkëshortja e ish-komandantit të UÇK-së Ramush Haradinaj, rrëfeu se e përcolli seancën e Gjykatës Speciale bashkë me vjehrrën e saj, Rukë Haradinajn, nënën e dëshmorëve Shkëlzen e Luan Haradinaj.
"Unë e përcolla dje seancën bashkë me Nanën Rukë, ajo filloi të qajë. Iu ngrit tensioni shumë dhe aty i thashë ty të kanë vdekë gjithë ata djemë, sepse ajo jo veç djemve të vet, por të gjithë ushtarëve të UÇK-së u thotë djemë të mi, i thashë s'ke çka me bo", tha Anita Haradinaj në një deklaratë në Klan Kosova, duke shtuar: "Aty është gjykuar e gjithë lufta, jo vetëm ata katër individë."
Ajo foli edhe për vështirësitë e periudhës kur Ramush Haradinaj mbahej në paraburgim në Hagë, i gjykuar për krime lufte, proces në përfundim të të cilit ai u shpall i pafajshëm dhe u lirua.
Dy burra nga fshati Sinë dyshohet se u përplasën me dhunë me dy policë ndërsa po shoqëroheshin në komisariat. Në të njëjtin bulevard të Peshkopisë, një 36-vjeçar u kap me thikë dhe shufër metalike.
