Kushti i Haxhiut për rikthimin e Sejdiut: gjashtë deputetë të LDK-së në sallë

Gara për presidentin e Kosovës nuk e ka humbur ende kandidatin e saj të përbashkët. Ushtruesja e detyrës së presidentes, Albulena Haxhiu, ka thënë se Bekim Sejdiu mund të rikthehet në garë, me një kusht të qartë: gjashtë deputetët e LDK-së që nuk e kanë mbështetur kandidaturën e tij duhet të garantojnë se do të qëndrojnë në sallën e Kuvendit gjatë votimit.

Sejdiu, kandidat i përbashkët i Vetëvendosjes dhe i LDK-së, u tërhoq nga gara sepse, sipas Haxhiut, i mungonin votat. "Sa i përket kandidatit për president, ai është zoti Bekim Sejdiu. Ai është tërhequr prej garës sepse nuk e ka pasur mbështetjen e 6 prej deputetëve të LDK-së nuk e kanë mbështetur. Ne nuk jemi tërhequr nga marrëveshja. Unë jam e bindur që në qoftë se do të ketë, si me thënë, deklarim që do të qëndrojnë në sallë, atëherë jam e bindur që zoti Sejdiu do të rikthehet. Ai është tërhequr për shkak se nuk i ka pasur votat", tha ajo.

Haxhiu këmbënguli se marrëveshja mes Vetëvendosjes dhe LDK-së për kandidaturën e Sejdiut mbetet në fuqi. Çelësi, sipas saj, është shumica prej dy të tretash në Kuvend. "Unë mendoj që në qoftë se ka garanci që janë 2/3-at në Kuvend, mendoj që do të rikthehet. Unë kam vlerësuar që ai ka pranuar që të jetë kandidat i përbashkët i Vetëvendosjes dhe i LDK-së dhe çmoj integritetin e lartë profesional dhe moral që zoti Sejdiu ka shërbyer me dinjitet kudo që ka qenë, prandaj edhe kam konsideruar që një figurë e tillë është pikërisht për këtë pozicion të presidentit", deklaroi ajo.

Për daljen nga ngërçi politik, Haxhiu i la topin në fushën e kryeministrit në detyrë dhe kryetarit të Vetëvendosjes, Albin Kurti, i cili, sipas saj, drejton negociatat. Ajo e lidhi edhe me vendimin e Hagës thirrjen e saj për të shmangur zgjedhjet e parakohshme: "Megjithatë, çështjen e negociatave e drejton kryeministri Kurti, kryetari i Vetëvendosjes, dhe pikërisht nga ato takime mund të dalin çështje të cilat janë të rëndësishme për të ecur para dhe për të mos e çuar vendin në zgjedhje të parakohshme. Më besoni që gabimi më i madh që do të mund ta bënim tani për tani, sidomos pas vendimit të Hagës, do të ishte që ta çonim vendin në zgjedhje të parakohshme, prandaj unë ftoj partitë politike për qasje serioze dhe konstruktivitet në këtë drejtim".