Kurti zotohet: ligji në lexim të dytë të enjten, por presidenti të zgjidhet sot

Kurti ka vendosur një rend të qartë për Kuvendin e Kosovës: së pari presidenti, pastaj ligji. "Presidenti duhet të zgjidhet sot, ndërsa ligjin mund ta votojmë edhe më pastaj, sipas afatit 72-orësh", deklaroi ai.

Për të mbështetur qëndrimin e tij, Kurti iu referua rregullave procedurale të shqyrtimit të ligjeve: "Neni 85, procedura e përshpejtuar e shqyrtimit të projektligjit në lexim të parë nuk duhet të bëhet më herët se 48 orë dhe në lexim të dytë nuk mund të bëhet më herët se 72 orë, përveç në situata të shpallura emergjente ose të jashtëzakonshme".

Ai u zotua publikisht se, porsa të mbushen 72 orët nga leximi i parë, do të thirret seanca për votimin e ligjit në lexim të dytë, gjë që sipas tij do të ndodhte të enjten. Si argument kundër kalimit të nxituar, Kurti kujtoi se pikërisht qeverisë i janë rrëzuar në janar 12 ligje të miratuara në këtë mënyrë.