Kurti takon Trumpin për herë të parë në Nju Jork: Kosova duhet të jetë në NATO

Kryeministri i Kosovës, Albin Kurti, është takuar për herë të parë me presidentin e Shteteve të Bashkuara të Amerikës, Donald Trump, në një pritje në Nju Jork, në kuadër të Javës së Nivelit të Lartë të Asamblesë së Përgjithshme të OKB-së.

Takimin e bëri publik vetë Kurti, përmes një postimi në Facebook, të shoqëruar me fotografinë nga pritja. "Në kuadër të Javës së Nivelit të Lartë të Asamblesë së Përgjithshme të OKB-së, kisha nderin që të takoj për herë të parë Presidentin e Shteteve të Bashkuara të Amerikës, z. Donald J. Trump", shkroi ai.

Kryeministri e lidhi menjëherë takimin me një nga synimet kryesore të politikës së jashtme të Kosovës, anëtarësimin në Aleancën Veriatlantike. Sipas tij, në bisedë ai e falënderoi presidentin amerikan për rritjen e investimeve në mbrojtje brenda NATO-s. "E falënderova për ngritjen e valës së investimeve në mbrojtje në NATO, ku edhe Kosova duhet të anëtarësohet", theksoi Kurti.

Postimi u mbyll me një vlerësim për rolin e SHBA-ve ndaj Kosovës, të cilat kryeministri i cilësoi me tre epitete: "Shtetet e Bashkuara të Amerikës janë aleati kryesor, partneri i pazëvendësueshëm dhe miku special i Republikës së Kosovës."