Kurti rikthen Kodin Civil në Kuvend: përplasje me PDK-në për fertilizimin dhe gjininë

Një kod me 997 faqe dhe 1 mijë e 630 nene, por debati në Kuvendin e Kosovës u ngushtua te dy dispozita: fertilizimi i asistuar dhe ndryshimi i gjinisë në dokumentet e gjendjes civile. Kryeministri Albin Kurti paralajmëroi në seancën e sotme se Kodi Civil do të rikthehet për shqyrtim në Kuvend, pas një shkëmbimi të ashpër me deputetin e PDK-së, Eman Rrahmani.

Rrahmani kundërshtoi planet e Qeverisë për miratimin e tri nismave: Kodit Civil, Ligjit për fertilizimin e asistuar dhe Ligjit për gjendjen civile. Sipas tij, këto nisma cenojnë vlerat e familjes tradicionale.

Kurti iu përgjigj duke e paraqitur Kodin si një reformë të gjerë të së drejtës civile, që prek pronën, kontratat, marrëdhëniet familjare dhe trashëgiminë. "Qeveria planifikon të sjellë Kodin Civil në Kuvend, sepse Kosovës i nevojitet një reformë e qëndrueshme e të drejtës civile, prona, kontrata, marrëdhëniet familjare dhe trashëgimia janë marrëdhëniet përmes të cilave qytetari ndërton jetën e vet si individ. Kodi Civil i vendos ato në një tërësi të harmonizuar, ku dispozitat e plotësojnë njëra-tjetrën dhe ku të drejtat dhe përgjegjësitë bëhen më të qarta. Një kod i tillë duhet të hartohet me vetëdijen që do t’u shërbejë edhe brezave që vijnë. Kjo bëhet e kuptueshme kur flasim për pronën", tha Kurti.

Kryeministri mbrojti edhe nevojën që fertilizimi i asistuar të rregullohet me ligj dhe që shteti të mbështesë personat që përballen me vështirësi për t'u bërë prindër. "Duhet të shohim edhe rregullimin e fertilizimit të asistuar, dëshira për t’u bërë prind është një nga shprehjet më të thella të shpresës njerëzore, dëshira për të dhënë dashuri e për t’u kujdesur për një jetë tjetër, për shumë njerëz rruga drejt prindërimit shoqërohet me vështirësi që meritojnë mirëkuptim dhe një përgjigje të kujdesshme nga shteti", deklaroi ai.

Rrahmani nuk u bind. Ai e quajti fjalimin e kryeministrit retorikë fushate dhe precizoi se kundërshtimet e tij kanë të bëjnë konkretisht me dispozitat për fertilizimin e asistuar dhe për ndryshimin e gjinisë në dokumentet e gjendjes civile. "E kuptoj në fushatë mundesh të përdorësh këto fjali, mirëpo besoj se jemi në Kuvend. Çështjet janë konkrete, besoj se do të duhej të ishit korrekt. Kodi Civil dihet çka është kundërshtuar, te çështja për fertilizim, lejimi që gratë të bëhen nëna pa burrë si dhe për gjendjen civile është kundërshtuar ndërrimi i gjinisë. Ju në natën e mot moteve po e bini në Qeveri ligjin më ndërrua gjininë", tha Rrahmani.

Kurti ia ktheu duke i kërkuar deputetit të lexojë të gjitha nenet e Kodit dhe të mos fokusohet vetëm te dy prej tyre. "Kodi Civil, nëse nuk e kam gabim, i ka 997 faqe, 1 mijë e 630 nene, ka mundësi që ndihmon nëse i lexoni dhe i shqyrtoni. Përqendrimi në vetëm dy nene është rrezik t’ju bëhet obsesion. Ky është vetëm një sugjerim. Nuk është e thënë të pajtohemi secili në gjithçka. Në fillimin e javës së ardhshme do të mblidhet grupi punues në Ministrinë e Drejtësisë, ku do të diskutojnë gjithçka dhe do ta risjellin në Kuvend", tha ai.