Kurti premton pesë diga të reja: fshati si çelës i ekonomisë së Kosovës

Kryeministri i Kosovës, Albin Kurti, njoftoi planin e Qeverisë për ndërtimin e pesë digave të reja në vend. Ai nuk dha detaje për vendndodhjen, afatet apo koston e tyre. Kurti e bëri njoftimin gjatë një fjalimi për zhvillimin rural, të cilin e cilësoi me rëndësi të veçantë për Kosovën.

Fjalimi u mbajt në Konferencën XXII të Rrjetit Evropian për Zhvillimin Rural. Konferenca u organizua nga Kolegji Publik Ndërkombëtar i Biznesit Mitrovica (IBCM), së bashku me vetë Rrjetin, me temën "Zonat rurale reziliente dhe sistemet ushqimore të qëndrueshme: qeverisja, kornizat e politikave dhe sfidat strukturore".

Kurti renditi pikat e forta të vendit: tokën pjellore, burimet natyrore, traditën bujqësore dhe potencialin njerëzor. Ai pranoi edhe vështirësitë, nga sfidat strukturore deri te ndryshimet klimatike. Prandaj, tha ai, synimi i Qeverisë nuk është vetëm mbështetja e bujqësisë, por transformimi i saj.

Sipas kryeministrit, investimet e Qeverisë përfshijnë mbështetjen për fermerët dhe sipërmarrësit e rinj, për gratë në zonat rurale, si dhe fonde për ujitje, shëndetin e tokës, përpunimin dhe magazinimin. Objektivi, sipas tij, është që Kosova të mos mbetet eksportuese e lëndës së parë dhe importuese e produktit final.

"Duam të investojmë në ujë dhe ujitje, në shëndetin e tokës, si dhe në kapacitetet e përpunimit dhe magazinimit, në mënyrë që fermerët tanë t’i shtojnë vlerë prodhimeve të tyre, në vend që të eksportojnë produkte të papërpunuara dhe të importojnë produkte të gatshme", tha Kurti.

Krahas digave, ai përmendi mbrojtjen e tokës bujqësore dhe forcimin e lidhjeve mes fermerëve, industrisë dhe konsumatorëve. Siguria ushqimore, sipas tij, duhet të jetë një nga prioritetet. Prodhimin vendor e cilësoi si çështje ekonomike dhe strategjike, sidomos pas krizave të fundit që kanë goditur zinxhirët ndërkombëtarë të furnizimit.

Një pjesë e fjalimit iu kushtua integrimit evropian dhe Kornizës së ardhshme Financiare Shumëvjeçare të Bashkimit Evropian për periudhën 2028-2034. "E ardhmja e Kosovës është në Bashkimin Evropian", tha Kurti. Ai shtoi se mënyra se si BE-ja do ta hartojë buxhetin e ardhshëm dhe do t’i mbështesë vendet kandidate do të ndikojë edhe në gatishmërinë e fermerëve dhe të institucioneve të Kosovës.

Kryeministri theksoi se zhvillimi i fshatit nuk mund të kufizohet vetëm te bujqësia. Sipas tij, zonat rurale kanë nevojë edhe për arsim, shëndetësi, infrastrukturë, lidhje digjitale dhe mundësi punësimi.

"Nuk do të ketë Kosovë më të zhvilluar pa fshat më të zhvilluar. Nuk do të ketë ekonomi më të fortë pa bujqësi më produktive", tha ai.