Kurti për ligjin e Speciales: Kur ka vullnet e mundësi, është mëkat të mungojë suksesi

Nisma e Partisë Demokratike të Kosovës (PDK) për ndryshimin e Ligjit për Dhomat e Specializuara ka hyrë në procedurë qeveritare. Kryeministri i Kosovës, Albin Kurti, tha se projektligji është dërguar për vlerësim ligjor në Ministrinë e Drejtësisë dhe për analizë buxhetore në Ministrinë e Financave. Sipas tij, përgjigjet e të dyja ministrive pritet të vijnë brenda kësaj jave dhe do t'i përcillen menjëherë Kuvendit.

Kurti foli në një konferencë për media pas mbledhjes së Qeverisë. Ai u pyet për qëndrimin e PDK-së, e cila ndryshimin e ligjit për Specialen e kërkon si prioritet dhe këmbëngul që së pari të arrihet dakordimi për këtë çështje e më pas të zgjidhet Presidenti.

Kryeministri shpjegoi se ishte Zyra Ligjore e Kryeministrisë ajo që e dërgoi projektligjin në dy ministritë dhe e cilësoi këtë si procedurë të rregullt, që ndiqet me çdo nismë ligjore. "Brenda kësaj jave do ta kemi përgjigjen edhe nga MD dhe vlerësimin e departamentit të buxhetit nga MF. Do t'ia japim përgjigjen Kuvendit të Republikës", tha Kurti. Ai shtoi se këta janë hapa ligjorë dhe se për një gjë të tillë nuk ka nevojë të bëhen shkelje ligjore.

Për marrëdhënien me opozitën, Kurti u shfaq i sigurt se "ekziston rruga në të cilën mund të ecim bashkë", si për ndryshimin e ligjit për Gjykatën Speciale, ashtu edhe për zgjedhjen e Presidentit. Si "dëshmi e qartë" për këtë ai përmendi votimin në Kuvend të deklaratës së përbashkët për aktgjykimin dënues ndaj katër ish-krerëve të UÇK-së. Sipas kryeministrit, deklarata u miratua të hënën me 99 vota.

Megjithatë, ai refuzoi të hynte në detaje të negociatave. "Unë nuk besoj që këto diskutime duhet t'i bëjmë në media. Besoj që këto diskutime duhet të zhvillohen midis krerëve të partive, midis subjekteve parlamentare në biseda të brendshme, dhe më pas t'i publikojmë rezultatet e atyre bisedave", deklaroi Kurti.

Të paktën në retorikë, toni i tij ishte pozitiv. "Unë jam optimist sepse e kam parë që është e mundshme. Pra, përveçse kemi vullnet, kemi edhe mundësi. E kur ekziston edhe vullneti, edhe mundësia, është mëkat të mungojë suksesi", tha ai.

Kryeministri iu rikthye edhe vetë aktgjykimit të Speciales, duke folur për tri defekte kapitale. Sipas tij, nuk ka pasur ndërmarrje të përbashkët kriminale dhe kjo duhet të korrigjohet në apel. Kurti tha gjithashtu se ka munguar transparenca dhe se ka pasur "njëfarë mënyre gjykatë mono-etnike", ndërsa përmendi edhe pasaktësi faktike dhe historike në vendim.

Për fazën e apelit, ai tha se është shprehur gatishmëria për një strategji të përbashkët. "T'i mbledhim energjitë, kokat e fushës së caktuar, ekspertizë juridike në mënyrë që në Apel të bëhen korrigjimet e nevojshme dhe të triumfojë drejtësia", tha Kurti.