Kurti nga SHBA-ja: Verdikti i Hagës të korrigjohet në apel, Rama premton mbështetje

Dy kryeministrat u gjendën në të njëjtën kohë në Shtetet e Bashkuara të Amerikës dhe folën për të njëjtën çështje: aktgjykimin e Dhomave të Specializuara në Hagë ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit.

Kryeministri i Kosovës, Albin Kurti, që po qëndron në SHBA, tha se aktgjykimi duhet të kundërshtohet në shkallën e Apelit. Sipas tij, ai mbështetet në pasaktësi faktike, keqkuptime historike dhe gabime ligjore.

"Gjetjet e mbetura, megjithatë, u bazuan në pasaktësi faktike, keqkuptime historike dhe gabime ligjore. Ne presim që këto të korrigjohen plotësisht në apel", deklaroi Kurti.

Ai këmbënguli se vendimi i gjykatës nuk duhet barazuar me një vlerësim të luftës së UÇK-së dhe tërhoqi vëmendjen te akuzat që nuk qëndruan. "Është e rëndësishme të dallojmë atë që është thënë e pretenduar nga ajo që është provuar dhe vendosur nga gjykata. Pretendimi për 'Shtëpinë e Verdhë' dhe trafikimin e organeve, mbi të cilin u krijua pjesa dërrmuese e narrativës që parapriu themelimin e Dhomave të Specializuara, nuk ishte fare pjesë e aktakuzës. Ra pretendimi për krime kundër njerëzimit dhe sulme të gjera e sistematike ndaj popullatës civile", tha ai.

Për Kurtin, "lufta e Ushtrisë Çlirimtare të Kosovës ishte dhe mbetet e drejtë". Ai ngriti gjithashtu shqetësime për transparencën e Gjykatës Speciale dhe për dënimet e shqiptuara.

Po nga SHBA-ja foli edhe kryeministri i Shqipërisë, Edi Rama, gjatë një takimi me komunitetin shqiptar në Miçigan, ku tha se Shqipëria do të qëndrojë në krah të Kosovës. "Shqipëria s'mund të bëjë asgjë më shumë sesa t'i rrijë në krah Kosovës, por ata duhet të vendosin të bëjmë gjithçka për ta zhbërë atë vendim kundër atyre katër burrave", deklaroi Rama.

Aktgjykimi i shkallës së parë u shpall më 16 shtator. Ai i dënoi Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet. Katër ish-krerët e UÇK-së u shpallën fajtorë për disa krime lufte, ndërsa u shpallën të pafajshëm për akuzat për krime kundër njerëzimit.