Kurti në mbledhjen e parë të qeverisë: Presim verdikt lirues për krerët e UÇK-së në Hagë

Mbledhja e parë e Qeverisë "Kurti 4" u hap me një pritje: atë të verdiktit që Gjykata Speciale në Hagë duhet ta shpallë të mërkurën, më 16 shtator, për krerët e Ushtrisë Çlirimtare të Kosovës. Kryeministri Albin Kurti tha se e pret atë vendim si lirues.

"Pasnesër, pas dy ditësh Kosova, ne të gjithë presim vendimin e Gjykatës Speciale në Hagë për drejtuesit e Ushtrisë Çlirimtare të Kosovës, Hashim Thaçi, Jakup Krasniqi, Rexhep Selimi dhe Kadri Veseli. Për ne është gjithçka e qartë, populli i Kosovës, rezistenca dhe lufta jonë ka qenë e drejtë, çlirimtare dhe kundrejt një pushtuesi i cili kreu krime lufte, krime kundër njerëzimit dhe gjenocid. Besojmë e urojmë që edhe verdikti i së mërkurës të jetë në përputhje me këtë të drejtë dhe drejtuesit e UÇK-së të kthehen të lirë në vendin e tyre e pranë familjeve", deklaroi Kurti.

Mbledhja u mbajt një ditë pasi Kuvendi i Kosovës votoi kabinetin e ri, të dalë nga procesi zgjedhor i 7 qershorit 2026. Kurti e cilësoi qeverisjen e re si vazhdim të një mandati të ndërprerë, sipas tij, pa nevojë dhe në dëm të vendit, duke falënderuar qytetarët dhe deputetët.

"Qeverisja jonë e përbashkët është punë për qytetarin e mbrojtje për shtetin. Qeveria jonë është shërbim për publikun, jo privilegj për pakicën", tha ai.

Pjesa më politike e fjalës iu kushtua çështjes që mbetet e hapur: zgjedhjes së presidentit. "Sot kur po flasim jemi me Kuvend të konstituar e Qeveri të zgjedhur, e përpara kemi çështjen e presidentit dhe një marrëveshje politike mes LVV-LDK për kandidatin për president", tha kryeministri, i cili është edhe kryetar i Lëvizjes Vetëvendosje.

Sipas tij, pengesa vjen nga brenda radhëve të partnerit të marrëveshjes. "Para nesh është sfida me qëndrimin e shprehur nga disa deputetë nga radhët e LDK-së, të cilët nuk duan ta zbatojnë marrëveshjen e arritur me mund e përkushtim pas një procesi negociatash jo të lehta", deklaroi Kurti. Emri i kandidatit të dakorduar mes dy partive nuk u bë publik.

Kurti paralajmëroi se një kthim i ri në kuti votimi do të ishte pa kuptim. "Jemi kaq afër zgjidhjes së presidentit saqë do të ishte e pafalshme të shkojmë sërish në zgjedhje", tha ai, duke shtuar: "Jam i bindur se edhe një proces i panevojshëm zgjedhor jo vetëm që s'do të sillte diçka të re në mozaikun politik, por do të ishte papërgjegjësi ndaj interesit publik dhe pamaturi e madhe politike".

Thirrja e tij iu drejtua të gjithë spektrit politik: "Si kryetar i LVV-së dhe si kryeministër, ju bëj thirrje liderëve politikë, kolegëve të mi, deputetëve: le ta zgjidhim çështjen e presidentit, t'i japim vendit tonë institucionin në përputhje me vullnetin e qytetarëve".

Kryeministri e vendosi këtë apel në kontekstin e një cikli të gjatë bllokade institucionale. Sipas tij, pas zgjedhjeve të rregullta të 9 shkurtit 2025 dhe një mandati të plotë katërvjeçar, vendi kaloi në dy procese të tjera zgjedhore, më 28 dhjetor 2025 dhe më 7 qershor 2026, të cilat, siç tha ai, nuk sollën rezultat tjetër. "Bllokada e barrikadim për zgjedhjet e dhjetorit 2025, e qytetarët folën qartë e barrikadim sërish për të shkuar në zgjedhje më 7 qershor 2026, edhe një herë qytetarët folën qartë", u shpreh Kurti, duke shtuar se në vitin 2026 u shkua në zgjedhje "për shkak të barrikadimit të presidentit".