Kurti: Kjo fundjavë vendos nëse Kosova do të ketë president javën e ardhshme

Kosova ka hyrë në fundjavën që mund të përcaktojë fatin e institucionit më të lartë të shtetit. Kryeministri Albin Kurti deklaroi të premten se bisedimet për një marrëveshje mbi zgjedhjen e presidentit kanë filluar.

"Kemi filluar diskutimet dhe, natyrisht, kjo fundjavë është vendimtare për arritjen e një marrëveshjeje, në mënyrë që të kemi president javën e ardhshme", tha Kurti.

Afati është i ngushtë dhe i prerë. Partitë politike duhet të bien dakord për kreun e shtetit deri më 6 tetor. Nëse kjo nuk ndodh, pritet që vendi të shkojë sërish në zgjedhje parlamentare.

Kufirin kohor e ka vendosur Gjykata Kushtetuese, e cila javën e kaluar vendosi se afati 60-ditor për zgjedhjen e presidentit nisi të rrjedhë pas konstituimit të Kuvendit. Me këtë vendim, presioni mbi partitë është zhvendosur tani te tryeza e bisedimeve, ku ende nuk dihet se cili emër mund të sigurojë mbështetjen e nevojshme.