Kurti kërkon bazë të përhershme amerikane në Kosovë: Bondsteeli garanci për paqe

Kryeministri në detyrë i Kosovës, Albin Kurti, ka ngritur sërish kërkesën për një prani të përhershme ushtarake amerikane në vend, duke propozuar që Kampi Bondsteel të shndërrohet në bazë të qëndrueshme të Shteteve të Bashkuara.

Kërkesa erdhi pas një takimi që Kurti zhvilloi në Zyrën e Kryeministrit me senatoren amerikane Joni Ernst. Sipas kryeministrit, bisedimet u përqendruan te zhvillimet në Kosovë dhe partneriteti me Shtetet e Bashkuara, duke përfshirë progresin ekonomik të vendit dhe përmirësimin e situatës së brendshme të sigurisë.

Një nga temat qendrore të takimit, sipas Kurtit, ishte prania ushtarake amerikane në Kosovë. "Kampi Bondsteel duhet të shndërrohet në prezencë të përhershme ushtarake në Republikën tonë. Një prezencë e tillë do të shërbente si garantuese për paqe dhe siguri në Kosovë dhe rajon, si dhe një bazë strategjike për operacionet e NATO-s në Evropën Juglindore", deklaroi kryeministri.

Kurti e cilësoi senatoren Ernst si një mbështetëse të fortë të Kosovës dhe një ndër avokueset më të zëshme të vendit në Kongresin amerikan. "Pas takimit që patëm në shtator të vitit të kaluar në Uashington DC, pata kënaqësinë të pres në Zyrën e Kryeministrit senatoren Joni Ernst, një nga miket e mëdha të Republikës dhe avokueset më të zëshme të Kosovës në Kongresin e Shteteve të Bashkuara të Amerikës", shkroi ai, duke iu referuar një takimi të mëparshëm mes tyre në Uashington.