Kurti i kërkon PDK-së kandidatin për nënkryetar: Të mos humbim kohë me procedura

Një kandidaturë e munguar po mban peng një pjesë të punës së Kuvendit të Kosovës. Kryeministri Albin Kurti i ka kërkuar Partisë Demokratike të Kosovës ta propozojë sa më shpejt kandidatin e saj për nënkryetar të Kuvendit, duke kërkuar që institucionet të vazhdojnë punën pa vonesa.

Kurti tha se partitë parlamentare duhet të angazhohen në funksionalizimin e komisioneve dhe të mos e zvarrisin procesin me procedura.

"Të punojmë dhe të mos humbim kohë me procedura. E ftoj PDK-në që të vijë sa më shpejt ta propozojë edhe ajo kandidatin për nënkryetar të Kuvendit dhe të punojmë bashkë në komisione parlamentare", deklaroi kryeministri.

Në thirrjen e tij, Kurti vuri theksin se përgjegjësia për shtetin nuk i takon vetëm shumicës qeverisëse dhe se edhe opozita duhet të ketë rol aktiv në Kuvend.

"Qeveria është e udhëhequr nga VV-ja, por në anën tjetër shteti dhe Republika nuk janë të qeverisë, janë edhe të opozitës, e cila duhet të jetë aktive në Kuvend", tha ai për mediat.

PDK-ja nuk ka reaguar ndaj kësaj kërkese.