Kurti dhe Rama krah për krah me Von der Leyen në fakultetin e ri prej 17,98 milionë eurosh

Pas muajsh kritikash të ashpra nga kryetari i Prishtinës, Përparim Rama, ndaj kryeministrit të Kosovës, Albin Kurti, të dy u gjendën dje në të njëjtin vend, në shoqërinë e presidentes së Komisionit Evropian, Ursula von der Leyen. Rasti ishte vizita në objektin e ri të Fakultetit të Matematikës dhe Shkencave Natyrore të Universitetit të Prishtinës.

Ndalesa në fakultet ishte pjesë e vizitës që Von der Leyen po zhvillon në Kosovë. Kurti e shoqëroi presidenten e Komisionit nëpër ambientet e reja, ndërsa prania e Ramës në të njëjtën ngjarje u vu re si një takim i rrallë mes dy politikanëve që ndajnë kryeqytetin, por jo qëndrimet.

Ndërtesa, me një sipërfaqe prej rreth 14 mijë metrash katrorë, kushtoi gjithsej 17,98 milionë euro. Pjesën më të madhe, rreth 11,9 milionë euro, e financoi Bashkimi Evropian. Universiteti i Prishtinës kontribuoi me 5,08 milionë euro, ndërsa Ministria e Arsimit me 1 milion euro.

Projekti u realizua në kuadër të marrëveshjes financiare për IPA 2020, të nënshkruar mes Republikës së Kosovës dhe Bashkimit Evropian.

Përfitues kryesorë janë studentët: rreth 2.300 prej tyre pritet të mësojnë në objektin e ri. Ata kanë tashmë në dispozicion ambiente bashkëkohore, pajisje laboratorike, inventar të ri dhe hapësira më të mëdha përreth ndërtesës.