Kurti 4 kalon me 62 vota, opozita e çon qeverinë e re drejt Kushtetueses

Numri ndryshoi, ekipi jo. Kuvendi i Kosovës i dha besimin qeverisë së re, e cila tashmë quhet Kurti 4, me 62 vota për dhe tetë kundër, pa asnjë abstenim. Kundër votuan tetë deputetët e Listës Serbe.

Lista e kabinetit mbetet e njëjtë me atë të Qeverisë Kurti 3. Glauk Konjufca vazhdon si zëvendëskryeministër i parë dhe ministër i Punëve të Jashtme dhe Diasporës, Donika Gërvalla mbetet zëvendëskryeministre e dytë dhe ministre e Drejtësisë, ndërsa Fikrim Damka rikonfirmohet zëvendëskryeministër i tretë. Hekuran Murati qëndron në krye të Financave, Ejup Maqedonci në Mbrojtje dhe Xhelal Sveçla në Punë të Brendshme.

Në kabinet vazhdojnë gjithashtu Arben Vitia, Hajrulla Çeku, Saranda Bogujevci, Elbert Krasniqi, Blerim Gashani, Fitore Pacolli, Armend Muja, Mimoza Kusari, Dimal Basha, Artane Rizvanolli, Nenad Rashiq dhe Rasim Demiri. Pjesë e kabinetit të ri është edhe Andin Hoti.

Seanca u zhvillua pa tri parti opozitare: PDK-ja, LDK-ja dhe AAK-ja nuk morën pjesë në votim. PDK-ja dhe AAK-ja shkuan një hap më tej se bojkoti, duke paralajmëruar se do ta kundërshtojnë në Gjykatën Kushtetuese formimin e qeverisë, të cilin e konsiderojnë jokushtetues.

Ky është pikërisht testi që i pret të gjithë: legjitimiteti i kabinetit të votuar do të varet edhe nga fjala përfundimtare e Gjykatës Kushtetuese, nëse ankesa e dy partive opozitare depozitohet.