Kuba mbetet sërish në errësirë: rrjeti elektrik shembet për të gjashtën herë

Në Havanë, njerëzit prisnin në radhë transportin publik në një qytet pa dritë. Rrjeti elektrik i Kubës u shemb sërish të premten, duke lënë miliona banorë anembanë ishullit pa energji, për të paktën të gjashtën herë që nga janari, kur presidenti amerikan Donald Trump ndërpreu furnizimin me karburant për ishullin.

Ndërprerjen në shkallë vendi e njoftoi Ministria e Energjisë dhe e Minierave përmes llogarisë së saj zyrtare në rrjetin X, duke bërë të ditur se kishte nisur "aktivizimin e protokolleve për rikthimin e shërbimit".

Sipas autoriteteve kubane, defekti ndodhi në linjat e transmetimit në pjesën perëndimore të vendit. Sistemi ra në atë zonë, deri në provincën Matanzas, ndërsa më pas u shkëput edhe pjesa lindore e ishullit. Gazeta zyrtare Granma raportoi se kushtet e "paqëndrueshme" atmosferike e rënduan më tej gjendjen e rrjetit.

Deri në muzg, energjia ishte rikthyer për 5 për qind të konsumatorëve në Havanë, një qytet me rreth 862 mijë abonentë sipas të dhënave zyrtare. Në provincat Camagüey, Pinar del Río dhe Granma po ngriheshin "mikro-ishuj" të vegjël shpërndarjeje, ndërsa po riaktivizoheshin disa sisteme që furnizojnë spitalet dhe objekte të tjera emergjence.

"Askush nuk i duron dot këto ndërprerje të vazhdueshme. Nuk ka ushqim të mjaftueshëm, nuk ka ujë, nuk ka energji elektrike, ju s'e keni idenë", i tha Mercedes Rodríguez, punonjëse 60-vjeçare në Havanë, agjencisë The Associated Press, ndërsa priste transportin publik për t'u kthyer në shtëpi. "Vendi është në një gjendje kaq të trishtë, dhe nuk ka fjalë për atë që po kalojmë."

E ulur në hyrje të pallatit të saj në qendër të Havanës, Abilén Marrero, amvise, e përshkruante pritjen si të vetmen zgjidhje: "Ndoshta kthehet sot pasdite ose nesër, s'ka si ta dish. Thjesht duhet të presim."

Shembjet e rrjetit janë bërë gjithnjë e më të shpeshta gjatë dy viteve të fundit për shkak të krizës së rëndë ekonomike që ka pushtuar ishullin, dhe janë përkeqësuar që nga janari, pasi Shtetet e Bashkuara vendosën një bllokadë energjetike që synon të detyrojë ndryshimin e sistemit politik në Kubë. Trump nënshkroi një urdhër ekzekutiv që parashikon tarifa ndaj vendeve që i shesin ose i furnizojnë naftë Kubës.

Kufizimet e pengojnë Kubën të importojë karburantin e nevojshëm për të vënë në punë termocentralet e saj, si dhe pjesët e këmbimit për të mirëmbajtur një infrastrukturë që në shumë raste është e vjetruar. Që atëherë është dorëzuar vetëm një ngarkesë karburanti, nga një tanker rus në mars.

Dy ndërprerjet e fundit në shkallë kombëtare kishin ndodhur në fillim të gushtit, pas atyre në korrik dhe në mars, si dhe pas disa ndërprerjeve rajonale. Edhe kur rrjeti kombëtar funksionon, kubanët përballen rregullisht me ndërprerje që zgjasin mbi 30 orë rresht.