"Ku je shpiune": grafit në murin e Ministrisë së Drejtësisë pas verdiktit të Hagës

Në murin e objektit ku ndodhet Ministria e Drejtësisë u shfaq një grafit i shkurtër dhe i drejtpërdrejtë: "Ku je shpiune". Aksioni ndodhi një ditë pas shpalljes së aktgjykimit të Dhomave të Specializuara të Kosovës në Hagë ndaj katër ish-krerëve të Ushtrisë Çlirimtare të Kosovës dhe u drejtua kundër ministres së Drejtësisë, Donika Gërvalla-Schwarz.

Sipas Gazeta Express, gjatë aksionit një polic tenton ta ndalojë shkrimin e mbishkrimit. Në pamjet e publikuara nga Nacionale shihet një person duke shkruar "Ku je shpiune?". Autorët e aksionit nuk janë identifikuar.

Gërvalla nuk është deklaruar që nga dje, kur u shpall aktgjykimi dënues. Ajo akuzohet për dërgim të dosjeve në Gjykatën Speciale, akuzë të cilën vetë e ka mohuar. Aksioni lidhet me heshtjen e saj ndaj vendimit dhe me një deklaratë të mëhershme, në të cilën ministrja thoshte se do të dorëzonte dosje në Gjykatën Speciale.

Më 16 shtator, trupi gjykues i shpalli Hashim Thaçin, Kadri Veselin, Jakup Krasniqin dhe Rexhep Selimin fajtorë për katër akuza për krime lufte: ndalim dhe arrestim të paligjshëm ose arbitrar, trajtim mizor, torturë dhe vrasje të paligjshme. Në të njëjtën kohë, ata u liruan nga akuzat për krime kundër njerëzimit.

Thaçi dhe Krasniqi u dënuan me nga 25 vjet burgim, Veseli me 18 vjet dhe Selimi me 13 vjet. Aktgjykimi është i shkallës së parë dhe ekipet mbrojtëse kanë paralajmëruar ankesë në Apel.