Kroaci: Opozita mbledh mbi 50 nënshkrime për rrëzimin e qeverisë së Plenkoviçit

Opozita në Kroaci ka mbledhur mbi 50 nënshkrime për të nisur procedurën e mocionit të mosbesimit ndaj qeverisë, duke e ngritur çështjen mbi katastrofën mjedisore në rajonin e Likës. Nisma u prezantua të enjten në një konferencë për shtyp në Kuvendin kroat (Sabor) nga deputetët e Partisë Social-Demokrate (SDP).

Deputeti i SDP-së, Saša Đujić, tha se partia mblodhi më shumë se 50 nënshkrime për rrëzimin e qeverisë, ndonëse për të nisur procedurën mjaftojnë 30. Sipas tij, përveç SDP-së dhe partisë Možemo, nismën e mbështetën edhe GLAS, Centar, Dalija Orešković dhe IDS.

"Konsiderojmë se ky është i vetmi hap politik i përgjegjshëm. Nisma së shpejti do të vijë në rendin e ditës të Saborit dhe duhet të diskutohet brenda 30 ditësh. Nuk do të lejojmë që përgjegjësia e qeverisë dhe e Andrej Plenkoviçit për katastrofën mjedisore në Lika të humbasë në përplasje politike", deklaroi Đujić.

Ai e cilësoi këtë aferë si "vetëm maja e ajsbergut", duke pretenduar se kryeministri Andrej Plenković ka ndërtuar në dhjetë vitet e fundit një sistem në të cilin institucionet janë të kapura, ndërsa ata që duhej të kontrollonin krimin dhe paligjshmërinë nuk e kanë bërë punën e tyre.

"Ndërsa ministrja u thotë qytetarëve t'u besojnë institucioneve, pikërisht ato institucione mundësuan që të arrihej deri këtu. Kjo vlen veçanërisht për ish-inspektorin kryesor shtetëror Andrija Mikuliç, emërimi i të cilit që në fillim ngjalli dyshime serioze, për t'u ndaluar në fund dhe për t'u dyshuar për veprime korruptive", tha Đujić. Ai shtoi se, për shkak të gjithë kësaj, SDP-ja ka nisur procedurën për mocion mosbesimi ndaj Plenkoviçit dhe qeverisë së tij.

Mihael Zmajlović, po ashtu nga SDP-ja, tha se qeveria i siguron qytetarët që situata është nën kontroll, ndërsa gjendja në Gospiç, sipas tij, tregon të kundërtën. "Sistemi i mbikëqyrjes ka qenë i dobët prej vitesh, dhe në krye të tij ishte inspektori kryesor shtetëror që u ndalua dhe dyshohet për marrje ryshfeti dhe favorizim në raste konkrete, përfshirë ato të lidhura me këtë aferë. Qeveria nuk ka program rehabilitimi. Ministrja e konfirmoi këtë në komisionin parlamentar duke thënë se vetëm së fundmi kishte nisur të flitej për detyrën projektore, ndërkohë që procedurat e prokurimit publik zgjasin me muaj pa rezultate konkrete", pohoi Zmajlović.

Ai kërkoi masa urgjente për ndalimin e ndotjes së mëtejshme dhe hartimin e një programi rehabilitimi. "Por kjo qeveri nuk di ta bëjë këtë. Garancia e vetme e qëndrueshme që raste të tilla të mos përsëriten është largimi i gjithë qeverisë", përfundoi ai.

Sipas rregullit, për të nisur procedurën nevojiten 30 nënshkrime, ndërsa nisma duhet të diskutohet në Sabor brenda 30 ditësh. Andrija Mikuliç, i cituar nga opozita si figura qendrore e dyshimeve, mbetet nën hetim dhe nuk është shpallur fajtor nga asnjë gjykatë.