Kriza politike i kushton Kosovës: mbi 100 milionë euro të BE-së në rrezik

Ora po ecën kundër Kosovës. Më pak se tre muaj kanë mbetur për të përmbyllur reformat që kërkon Plani i Rritjes i Bashkimit Evropian, dhe nëse afati nuk respektohet, vendi rrezikon të humbasë mbi 100 milionë euro.

Tani që presidentja e re është zgjedhur dhe të gjitha institucionet janë funksionalizuar, pritshmëria është që Kuvendi dhe Qeveria t'i kthejnë vëmendjen pikërisht kësaj agjende. Njohësit e fushës thonë se kriza politike dhe mungesa e institucioneve kanë sjellë ngecje dhe shprehen skeptikë nëse Kosova do t'i përfitojë fondet.

Besar Gërgi, nga Grupi për Studime Politike dhe Juridike, e mat dëmin në para: "Këtu kemi të bëjmë me 27 hapa reformues dhe ato vlejnë në total diku 166 milionë euro. Një pjesë e reformave janë përfunduar, por pasi ka pasur kriza politike, shumë ligje nuk kanë kaluar, andaj kriza politike na ka kushtuar financiarisht me humbje nga agjenda e reformave".

Njohësi i politikës Ardian Zeqiri e sheh zgjidhjen te zgjatja e afatit të dhjetorit. "Pakoja e ligjeve nuk është e finalizuar. Ky është proces i cili nuk shkon shpejt. Është një procedurë që e kërkon kohën e vet dhe Kosova është mbrapa. Nëse nuk rinegociohet afati i dhjetorit, rreziku është që të humbasin mjetet", tha ai.

Një hap është bërë këtë javë: deputetët e Kosovës miratuan disa nga ligjet që janë parakusht për fondet e BE-së. Megjithatë, sipas njohësve të fushës, institucionet duhet të punojnë intensivisht dhe të përcaktojnë qartë prioritetet, nëse duan që agjenda e reformave të zbatohet në kohë.