Kriza e konstituimit të Kuvendit: PDK i kërkon Deharit ta thërrasë seancën, Zemaj paralajmëron "rrëshqitje në anarki"

Bllokada për konstituimin e Kuvendit të Republikës së Kosovës është kthyer në një përplasje të hapur mes kryesuesit të seancës konstituive dhe partive që kërkojnë përfundimin e procesit.

Grupi Parlamentar i Partisë Demokratike të Kosovës (PDK) i është drejtuar me kërkesë zyrtare Avni Deharit, në cilësinë e tij si kryesues i seancës konstituive sipas moshës, që të thërrasë vazhdimin e seancës konstituive më 12 gusht 2026. Sipas PDK-së, moskonstituimi i Kuvendit brenda afatit të përcaktuar ka krijuar "një situatë të rëndë kushtetuese", por tejkalimi i afatit nuk e shuan detyrimin për konstituim — obligimi për përfundimin e procesit konstituiv, thonë ata, mbetet dhe duhet përmbushur pa vonesa.

PDK ka paralajmëruar se do të jetë e pranishme në sallën e Kuvendit të nesërmen, më 12 gusht, në orën 11:00 — pavarësisht nëse Dehari e përmbush apo jo obligimin për thirrjen e seancës — moment kur, sipas rregullores, përmbushet edhe 48-orëshi i dytë për vazhdimin e seancës. Grupi ka ftuar edhe të gjitha grupet e tjera parlamentare dhe deputetët e zgjedhur që të jenë të pranishëm në sallë.

Tonin më të ashpër e ka mbajtur deputeti i Lidhjes Demokratike të Kosovës (LDK), Armend Zemaj. Ai ka theksuar se Dehari e ka rolin e kryesuesit vetëm si deputeti më i vjetër dhe se nuk ka "autorizim të pafund ligjor e kushtetues" për të pamundësuar konstituimin e Kuvendit. Sipas Zemajt, thirrja e seancës është obligim kushtetues e jo çështje e dëshirës apo vullnetit politik "të një deputeti që keqpërdor një normë të Rregullores së Kuvendit".

"Seanca duhet të thirret, Kuvendi duhet të konstituohet dhe duhet t'i jepet mundësia formimit të institucioneve të reja. Përndryshe, kjo nuk është më demokraci, por rrëshqitje në anarki dhe kapje e shtetit. Çdo njeri nga ne që e lejon një veprim të tillë dhe e normalizon atë, në fakt po e normalizon edhe mosrespektimin e ligjit dhe të Kushtetutës", ka shkruar Zemaj në Facebook.

Në anën tjetër, Dehari të martën ka mbajtur qëndrimin se seanca do të thirret vetëm pas një marrëveshjeje politike. I pyetur nëse moskonstituimi i Kuvendit brenda afatit prej 30-ditësh konsiderohet shkelje e Kushtetutës, ai u përgjigj se pa sanksione nuk mund të flitet për shkelje.

"Seanca e radhës do të thirret sapo të ketë një marrëveshje për zgjidhjen e krizës. Pa një marrëveshje nuk ka kuptim të mbahet seanca vetëm për formalitet. Nuk ka sanksione dhe derisa nuk ka sanksione, nuk mund të thuhet se ka shkelje", tha Dehari gjatë një aktiviteti të Kuvendit për pritjen e mërgimtarëve.

Kriza vjen pas seancës së fundit, të mbajtur të shtunën, e cila përfundoi kur kryeministri në detyrë Albin Kurti kërkoi kohë shtesë për arritjen e një marrëveshjeje politike. Pas kësaj, deputetja e AAK-së Time Kadrijaj e gjuajti me vezë Kurtin, ndërsa seanca u ndërpre.