Krimi i organizuar rritet në Gjermani: 7.988 të dyshuar, 281 me shtetësi shqiptare

Grupet kriminale në Gjermani veprojnë gjithnjë e më shumë përtej kufijve, me metoda më brutale dhe me komunikim të zhvendosur në platforma digjitale. Ky është përfundimi i raportit zyrtar të policisë gjermane për vitin 2025, që evidenton një rritje të hetimeve dhe të numrit të personave të dyshuar për krim të organizuar.

Sipas Zyrës Federale Kriminalistike (BKA), autoriteti federal që raporton të dhënat, gjatë vitit të kaluar janë regjistruar 683 procedura hetimore për krim të organizuar, numri më i lartë që nga viti 2021. Numri i personave të dyshuar është rritur me më shumë se 13 për qind krahasuar me vitin paraprak, duke arritur nivelin më të lartë të pesë viteve të fundit.

Gjithsej janë identifikuar 7.988 persona të dyshuar. Grupin më të madh e përbëjnë shtetasit gjermanë, 2.722 veta, pasuar nga 664 shtetas turq, 402 shtetas sirianë, 281 shtetas shqiptarë dhe 258 shtetas polakë.

Pjesën më të madhe të hetimeve gjatë vitit 2025 e zunë krimet e lidhura me narkotikët. Pas tyre renditen veprat që lidhen me aktivitetin ekonomik, shkeljet tatimore dhe doganore, kontrabanda e qenieve njerëzore, krimet kundër pronës dhe pastrimi i parave.

BKA vëren një transformim të mënyrës se si funksionon krimi i organizuar në vend. Një shqetësim i veçantë i theksuar në raport është përfshirja në rritje e adoleshentëve në aktivitete kriminale.

Në tërësi, raporti i paraqet krimin e organizuar si një kërcënim në rritje për sigurinë në Gjermani. Të dhënat pasqyrojnë procedura hetimore dhe persona nën dyshim, jo vendime përfundimtare të gjykatave.