Kreshnik Kaçiu merr drejtimin e Gjykatës Administrative, premton efikasitet dhe transparencë

Gjykata Administrative e Kosovës ka kryetarin e saj të ri. Gjyqtari Kreshnik Kaçiu ka pranuar zyrtarisht detyrën, në një ceremoni pranim-dorëzimi ku përgjegjësia iu kalua nga gjyqtari Rexhep Gashi, i cili deri tani kishte qenë ushtrues detyre i kryetarit të kësaj gjykate.

Në fjalën e tij pas marrjes së detyrës, Kaçiu u zotua se do të punojë për avancimin e punës së gjykatës dhe përmbushjen e misionit të saj, me theks te forcimi i efikasitetit, profesionalizmit, transparencës dhe llogaridhënies institucionale.

Kaçiu falënderoi paraardhësin e tij, Gashin, për kontributin gjatë periudhës kur drejtoi gjykatën si ushtrues detyre, veçanërisht për angazhimin në fazën e parë të funksionimit të Gjykatës Administrative. Nga ana e tij, Gashi e uroi Kaçiun për emërimin, duke i dëshiruar sukses në drejtimin e institucionit.

Zgjedhja e tij ishte bërë nga Këshilli Gjyqësor i Kosovës më 10 shtator 2026, në mbledhjen e 372-të. Kaçiu mori nëntë vota për dhe një kundër, për një mandat katërvjeçar, pasi doli kandidati më i vlerësuar në procesin konkurrues me 74 pikë.