Kosovari që pretendon se spiunoi për CIA-n kundër Al-Kaedës, i arrestuar nga ICE dhe në prag dëbimi

Kishte shkuar bashkë me gruan në një zyrë emigracioni në Elizabeth të New Jerseyt vetëm për të rinovuar dokumentet. Sapo u regjistrua në recepsion, agjentët e ICE-së e morën dhe e futën në një dhomë. Kështu e përshkruan Susan Skoro çastin kur bashkëshorti i saj, Blerim Skoro, 55-vjeçar nga Kosova, u arrestua nga Zyra e Migracionit amerikan (ICE). Sot ai po lufton me disa avokatë kundër dëbimit nga Shtetet e Bashkuara.

Historia që Skoro rrëfen është e pazakontë. Sipas tij, ai erdhi në Amerikë në vitin 1994, pasi ishte larguar nga regjimi i atëhershëm jugosllav, duke treguar se ishte rrahur e torturuar dhe se kishte parë vrasje e përdhunime fëmijësh. Në vitin 2000 u arrestua për trafik droge — por pikërisht në burg, thotë ai, nisi bashkëpunimi i tij me autoritetet amerikane.

Sipas dokumenteve të FBI-së, Skoro u regjistrua si informator dhe dha informacione për persona të dyshuar për terrorizëm. Pas sulmeve të 11 shtatorit, ai pretendon se u kontaktua nga CIA për shkak të lidhjeve që kishte krijuar prapa grilave me terroristë dhe trafikantë. Nga viti 2002 deri më 2006, ndërsa vuante dënimin në një burg federal në Pensilvani, thotë se mblodhi informacione për FBI-në për disa persona që më vonë u dënuan në raste terrorizmi. Në dokumentet e FBI-së të vitit 2004 ai figuron si informator në një hetim të lidhur me Osama bin Ladenin, ku informacionet e tij cilësohen si të besueshme dhe të dobishme, përfshirë të dhëna për një kamp stërvitor në Siri.

Rrëfimi bëhet edhe më i çuditshëm pas kësaj. Skoro pretendon se nga viti 2007 deri më 2009 CIA e dërgoi në misione të fshehta, i infiltruar në rrethe të Al-Kaedës, duke udhëtuar nëpër Siri, Liban, Jordani, Pakistan, Egjipt dhe Kosovë. Sipas tij, puna e tij ndihmoi në arrestimin e pjesëtarëve të Al-Kaedës, të grupit somalez Al-Shabaab dhe të Hezbollahut. Një prej rasteve, thotë ai, ishte ai i Betim Kaziut — i dënuar me 27 vjet burg pasi tentoi të siguronte armë për Al-Shabaab-in për të sulmuar trupat amerikane jashtë vendit. Skoro thotë se ishte ai që u dha autoriteteve vendndodhjen e Kaziut në Kosovë, çka çoi në arrestimin e tij në vitin 2009. Ai pretendon gjithashtu se ndihmoi në kapjen e dërgesave të uraniumit në Kosovë, duke parandaluar një komplot të mundshëm me "bombë të ndyrë".

Por, sipas Skoros, ai nuk mori kurrë atë që priste. Besonte se do të përfitonte një dënim më të lehtë për bashkëpunimin, mirëpo në vitin 2007 u deportua në Kosovë. Aty, thotë ai, CIA i kishte kërkuar të vazhdonte punën e fshehtë nga Ballkani. Gjatë asaj periudhe pretendon se u qëllua në këmbë në një atentat në Kosovë dhe më vonë u kthye në SHBA përmes Kanadasë në vitin 2014. Dy vjet më pas, në 2016, u arrestua sërish nga autoritetet amerikane pasi NYPD-ja e kishte kapur duke përdorur kartën e zbritjes së transportit publik të vajzës së tij — çka nisi një tjetër betejë të gjatë për statusin e tij.