Kosovari i kërkuar nga Serbia për krime lufte ndalohet në kufi me Interpol, pret ekstradimin nga Kroacia

Një kontroll rutinë i pasaportës u kthye në arrestim për një shtetas të Kosovës në pikën kufitare ndërkombëtare Karasovici, në Kroaci. Kur autoritetet kroate futën të dhënat e tij në sistem, doli se ndaj tij qëndronte një fletarrestim ndërkombëtar i lëshuar nga Interpoli në Beograd, për qëllime arrestimi dhe ekstradimi.

Sipas mediave kroate, bëhet fjalë për B.B., 49-vjeçar nga Nerodimja e Poshtme, i cili po hynte në Kroaci në timonin e një automjeti të tipit Audi A6 me targa gjermane. Fletarrestimi ndaj tij ishte lëshuar më 29 prill 2024, me kërkesë të Interpolit në Beograd.

Serbia e akuzon shtetasin kosovar se gjatë luftës në Kosovë, në fund të viteve '90, ka kryer krime lufte ndaj popullsisë civile. Të arrestuarit i janë njoftuar të drejtat ligjore dhe është nxjerrë para gjyqtarit hetues të Gjykatës së Qarkut në Dubrovnik, e cila i ka caktuar masën e paraburgimit në kuadër të procedurës për ekstradim.

Ekstradimi drejt Serbisë ende nuk është i sigurt. Autoritetet serbe kanë 40 ditë afat për t'i dorëzuar Gjykatës së Qarkut në Dubrovnik dokumentacionin e plotë me të cilin argumentojnë kërkesën për arrestim dhe dorëzim. Vetëm pas shqyrtimit të hollësishëm të kësaj dosjeje gjykata kroate do të marrë vendimin përfundimtar.

Sipas burimeve pranë hetimit gjyqësor të cituara nga mediat kroate, B.B. i ka mohuar kategorikisht akuzat për krime lufte. Ai ka paraqitur një version krejtësisht të kundërt të ngjarjeve dhe ka mohuar përgjegjësinë për veprën për të cilën akuzohet nga Serbia.

Lufta në Kosovë gjatë viteve 1998-1999 u shoqërua me krime të shumta ndaj civilëve. Shumica e krimeve të dokumentuara iu atribuuan forcave serbe, përfshirë policinë dhe Ushtrinë Jugosllave, ndërsa një numër më i vogël rastesh lidhen edhe me pjesëtarë të Ushtrisë Çlirimtare të Kosovës (UÇK).