Kosova ul kufirin e parasë së gatshme mes bizneseve në 300 euro, synim financimet e paligjshme

Kufiri i pagesave me para të gatshme ndërmjet bizneseve në Kosovë është ulur nga 500 në 300 euro. Masa, sipas ministrit të Financave, Hekuran Murati, synon të parandalojë financimin e paligjshëm dhe t'i bëjë transaksionet financiare më të gjurmueshme.

Murati foli për ndryshimin në një aktivitet të organizuar nga Ministria e Financave në kuadër të Procesit të Berlinit për financat e paligjshme, me temën "Përtej përputhshmërisë: Ndërtimi i ekonomive të qëndrueshme përmes integritetit financiar". Nuk u bë e ditur se prej kur ka hyrë në fuqi kufiri i ri.

Për ministrin, ligjet e mira nuk mjaftojnë nëse nuk prodhojnë rezultat. "Natyrisht, rëndësi ka të kemi ligjet e duhura dhe të përmbushim standardet ndërkombëtare, por ligjet në letër nuk tregojnë nëse sistemi funksionon vërtet. Prova e vërtetë qëndron në atë që ndodh më pas", tha ai. Paraja e gatshme, sipas tij, ishte pika më e lehtë për të nisur: "Këto pagesa zakonisht nuk mund të gjurmohen, ose gjurmimi i tyre është i vështirë, dhe ato mund të përdoren për financim të paligjshëm".

Rregulli ndryshon për blerjet e qytetarëve. Në transaksionet ndërmjet bizneseve dhe konsumatorëve, kufiri i pagesave në dorë është 2.000 euro, ndërsa shuma mbi të duhet të kalojë përmes një institucioni financiar të licencuar në vend. "Pjesa tjetër mund të kryhet, ose duhet të kryhet, përmes një transaksioni të gjurmueshëm në një institucion financiar të licencuar në vend", sqaroi Murati.

Ministri përmendi edhe një hap tjetër: Banka Qendrore ka nisur të vërë nën kontroll dhe të licencojë operatorët e këmbimit që përdorin kriptovaluta. Sipas tij, kjo mund të ndihmojë që pagesat të bëhen digjitale, të gjurmueshme dhe më transparente, duke mbështetur konkurrencën e ndershme dhe kalimin e më shumë aktiviteti ekonomik në ekonominë formale. Megjithatë, ai paralajmëroi se lufta nuk fitohet e vetme: "Paratë e përfituara në mënyrë të paligjshme kalojnë shumë lehtë përtej kufijve, prandaj edhe bashkëpunimi ynë duhet të jetë po aq i lehtë dhe efikas".

Të njëjtën linjë mbajti edhe ambasadori i Malit të Zi në Kosovë, Bernard Çobaj, vendi i të cilit kryeson Procesin e Berlinit. Ai e lidhi integritetin financiar me ndërtimin e ekonomive të besueshme, mbrojtjen e burimeve publike dhe konkurrencën e drejtë, dhe tha se procesi krijon hapësirë për bashkëpunim rajonal kundër flukseve të paligjshme financiare. "Prandaj, integriteti financiar është më shumë sesa një çështje teknike. Ai është një domosdoshmëri ekonomike dhe e sigurisë, si dhe parakusht për të ardhmen evropiane që synojmë të ndërtojmë", deklaroi Çobaj.

Zëvendësambasadorja e Gjermanisë në Kosovë, Silke Bellmann, propozoi tri shtylla: transparencën, inovacionin dhe partneritetin. Ajo kërkoi mbylljen e zbrazëtive ligjore "që u mundësojnë kriminelëve të fshihen pas kompanive fiktive anonime", përdorimin e analizës së avancuar të të dhënave dhe të inteligjencës artificiale për të gjurmuar rrjetet kriminale në kohë reale, si dhe "shkëmbim më të fuqishëm të informacioneve përtej kufijve".