Kosova ndryshon sanksionet ndaj Rusisë: përjashtime të përkohshme për kontratat ekzistuese

Kontratat që janë ende në fuqi do të mund të përmbyllen, ndërsa komponentët kritikë industrialë do të mund të sigurohen derisa të gjenden burime alternative furnizimi. Këto janë përjashtimet e përkohshme që Qeveria e Kosovës ka futur në regjimin e saj të sanksioneve ndaj Rusisë, pasi miratoi ndryshimet dhe plotësimet e vendimit të vitit 2022.

Atë vit, kur nisi agresioni rus në Ukrainë, Kosova vendosi të zbatojë vendimin e Këshillit të Bashkimit Europian për sanksionet ndërkombëtare ndaj Rusisë. Ndryshimi i ri, i propozuar nga Ministria e Punëve të Jashtme dhe e Diasporës, e përshtat atë vendim me zhvillimet në politikën evropiane të masave kufizuese.

Pikën para kabinetit qeveritar e paraqiti ministri i Jashtëm, Glauk Konjufca, i cili shpjegoi përmbajtjen e vendimit dhe përjashtimet që ai parashikon. "Qëllimi është linjëzimi i vazhdueshëm i politikës së jashtme të Kosovës me Politikën e Përbashkët të Jashtme dhe të Sigurisë së Bashkimit Europian", tha Konjufca.

Në të njëjtën frymë foli edhe kryeministri Albin Kurti, i cili tha në mbledhjen e Qeverisë se vendimi merret për t'u linjëzuar me politikën e jashtme dhe të sigurisë së Bashkimit Europian.

Sipas Konjufcës, miratimi i ndryshimeve konfirmon "përkushtimin tonë për promovimin e paqes, demokracisë dhe të drejtave të njeriut, si dhe garanton vazhdimësinë e bashkëpunimit të ngushtë me BE-në për ruajtjen e plotë të zbatueshmërisë së ligjeve dhe konventave europiane e ndërkombëtare në Republikën e Kosovës". Ministri theksoi gjithashtu se vendimi mbështetet në bazën kushtetuese dhe ligjore të Republikës së Kosovës.