Kosova drejt SEPA-s: BQK parashikon mbi 55 milionë euro kursime në vit nga pagesat

Mbi 55 milionë euro në vit: aq mund të kursejnë qytetarët dhe bizneset e Kosovës nga pagesat ndërkufitare më të lira, nëse vendi përfshihet në Zonën e Vetme të Pagesave në Euro (SEPA), sipas vlerësimit të Bankës Qendrore të Republikës së Kosovës (BQK). Por rruga drejt aplikimit final kalon ende nga Kuvendi.

BQK ka mirëpritur miratimin nga Qeveria të Projektligjit për ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit, si dhe procedimin e tij në Kuvend, duke e cilësuar këtë si një hap të rëndësishëm drejt aplikimit të Kosovës në SEPA. Ndryshimet ende nuk janë miratuar nga Kuvendi, ndërsa ky miratim është hapi i fundit ligjor para aplikimit.

Sipas BQK-së, pasi ndryshimet të miratohen dhe të hyjnë në fuqi, institucioni do të mund të procedojë me aplikimin final për përfshirjen e Kosovës në shtrirjen gjeografike të SEPA-s, sapo të përmbushen kërkesat e mbetura rregullative. Banka thotë se ka përfunduar tashmë pjesën kryesore të përgatitjeve institucionale, ligjore, rregullative dhe teknike që lidhen me këtë proces.

Në kuadër të zbatimit të Ligjit të ri për Shërbimet e Pagesave dhe përafrimit me kornizën e Bashkimit Evropian, BQK ka miratuar mbi 20 rregullore dhe akte të tjera rregullative. Mbeten edhe dy rregulloret e fundit që lidhen me kërkesat për SEPA, të cilat banka planifikon t'i miratojë pas hyrjes në fuqi të ndryshimeve në legjislacionin kundër pastrimit të parave dhe financimit të terrorizmit. Me to, sipas institucionit, do të kompletohej korniza rregullative e nevojshme për aplikimin e Kosovës.

Përfitues të drejtpërdrejtë, sipas BQK-së, do të jenë veçanërisht qytetarët që pranojnë remitanca nga jashtë, por edhe bizneset, eksportuesit dhe importuesit. Pagesat në euro ndërmjet Kosovës dhe vendeve të zonës SEPA pritet të kryhen më shpejt, me efikasitet më të madh dhe me kosto më të ulët.

Banka Qendrore e sheh SEPA-n si pjesë e një pakete më të gjerë ndryshimesh. Së bashku me zhvillimin e sistemit të pagesave të shpejta TIPS Clone, ajo përbën një nga dy reformat kryesore në modernizimin e infrastrukturës financiare dhe të pagesave në Kosovë. Sipas BQK-së, këto procese synojnë të krijojnë bazën për një sistem modern pagesash, interoperabël dhe të përafruar me standardet dhe infrastrukturën evropiane, duke synuar jo vetëm kosto më të ulëta dhe pagesa më të shpejta, por edhe forcimin e konkurrencës dhe të inovacionit në sektorin financiar. Banka pret gjithashtu që këto zhvillime të rrisin përfshirjen financiare.

Duke vlerësuar bashkëpunimin ndërinstitucional, BQK ka bërë të ditur se pret përfundimin e hapave të mbetur ligjorë për të proceduar me aplikimin. "BQK mbetet plotësisht e angazhuar që, në koordinim me institucionet vendore, sektorin financiar dhe partnerët evropianë, të avancojë reformat që mundësojnë integrimin e mëtejshëm të sistemit financiar të Kosovës në tregun dhe infrastrukturën financiare evropiane", thuhet në qëndrimin e institucionit.