Kosova del në treg me obligacione 7-vjeçare: ankandi i radhës më 19 gusht, vlera 15 milionë euro

Shteti i Kosovës kthehet në treg për të huazuar para nga investitorët e brendshëm. Ministria e Financave ka njoftuar se më 19 gusht 2026 do të mbahet ankandi i gjashtë i letrave me vlerë për këtë vit.

Në këtë ankand parashihet të emetohen obligacione me maturitet 7-vjeçar, në një shumë të përgjithshme prej 15 milionë eurosh.

Sipas njoftimit të Ministrisë së Financave, bëhet fjalë për një investim të sigurt, të garantuar me Ligjin për Borxhin Shtetëror dhe Garancitë Shtetërore. Interesi i përcaktuar nga tregu u garantohet blerësve për të gjithë kohëzgjatjen shtatëvjeçare të obligacionit dhe është tërësisht i liruar nga tatimi.

Ata që duan të marrin pjesë udhëzohen t'u drejtohen bankave. "Për detaje rreth pjesëmarrjes në ankande për blerjen e letrave me vlerë, ju lutem kontaktoni ndonjërën nga Bankat Komerciale që operojnë në Republikën e Kosovës", thuhet në njoftim.