Kontrata e KEK-ut për shitjen e qymyrit, Tahiri: Shkelje ligji dhe abuzim me pasurinë e shtetit

Marrëveshja e Korporatës Energjetike të Kosovës (KEK) për shitjen e qymyrit në Maqedoninë e Veriut është kthyer në përplasje politike. Deputeti i Aleancës, Besnik Tahiri, e ka cilësuar kontratën si shkelje të ligjit dhe tejkalim të kompetencave nga Qeveria në detyrë.

Sipas Tahirit, çështja nuk mbetet vetëm te procedura. "Çdo marrëveshje ndërshtetërore jotransparente, përfshirë edhe atë të KEK-ut për shitjen e thëngjillit në Maqedoninë e Veriut, në rastin më të butë përbën shkelje të ligjit dhe tejkalim të kompetencave, veçanërisht në një kohë kur kjo Qeveri është në përplasje të hapur me Kushtetutën", tha ai.

Në vlerësimin e tij, në rastin më të rëndë bëhet fjalë për abuzim me pasuritë e Republikës së Kosovës — "pasuri për të cilat është derdhur gjak, djersë dhe sakrificë ndër breza".

Deputeti i Aleancës i kërkoi ministrisë përgjegjëse t'i nxjerrë në dritë të gjitha detajet e kontratës. "Ftojmë Ministrinë përgjegjëse të bëjë publike marrëveshjen dhe të gjitha dokumentet që lidhen me të. Transparenca nuk është luks dhe zgjedhje politike, por detyrim ligjor e institucional!", theksoi Tahiri.

Marrëveshja parashikon që përgjatë tre viteve KEK të eksportojë deri në 73.2 milionë euro thëngjill drejt Maqedonisë së Veriut, sipas ministres në detyrë të Ekonomisë, Artane Rizvanolli.