Konsultimet për presidentin nisin bosh: te Haxhiu shkojnë vetëm Kurti dhe aleatët e tij

Takimi konsultativ i thirrur nga ushtruesja e detyrës së presidentes së Kosovës, Albulena Haxhiu, për procesin e zgjedhjes së presidentit të ri, nisi me tryezën gjysmë të zbrazët. Në Zyrën e Presidentes mbërritën vetëm kryeministri në detyrë dhe kryetari i Lëvizjes Vetëvendosje, Albin Kurti, kryetarja e Alternativës, Mimoza Kusari-Lila, dhe kryetarja e Guxo-s, Donika Gërvalla, së bashku me përfaqësues të partive të komuniteteve joshumicë.

Takimi, i caktuar për orën 09:00, ishte thirrur për të diskutuar zhvillimet e fundit politike dhe institucionale dhe mundësinë e arritjes së një marrëveshjeje mes subjekteve politike për zgjedhjen e një presidenti konsensual.

Opozita mungoi tërësisht. Asnjëra nga partitë kundërshtare nuk iu përgjigj pozitivisht ftesës. PDK-ja dhe AAK-ja e refuzuan menjëherë, ndërsa LDK-ja u përgjigj negativisht një ditë më parë. Sipas Lajmi.net, PDK, LDK dhe Aleanca deklaruan se Haxhiu është thjesht deputete e betuar e Kuvendit të Kosovës.

Arsyetimi më i qartë erdhi nga kryetari i LDK-së, Lumir Abdixhiku, i cili tha se për partinë e tij Haxhiu është deputete. "Ne takimet i zhvillojmë me kryetarët e partive, në këtë rast takimin e vetëm që mund ta bëjmë është me kryetarin e LVV-së, Albin Kurtin. Në pikëpamjet tona, zonja Haxhiu është deputete e Kuvendit dhe, në këtë rrjedhë, ne mund të flasim vetëm me ata që janë përgjegjës për këtë punë", tha Abdixhiku.

Me refuzimin e bllokut opozitar, konsultimet për një president konsensual nisën pa palët që do të duheshin për të siguruar një marrëveshje të gjerë.