Komandanti i KFOR-it pret ambasadorin britanik: në fokus siguria në Kosovë

Komandanti i misionit të NATO-s në Kosovë (KFOR), gjeneralmajor Özkan Ulutaş, ka pritur në selinë e KFOR-it në kampin Film City në Prishtinë ambasadorin e Mbretërisë së Bashkuar në Kosovë, Jonathan Hargreaves.

Sipas njoftimit të KFOR-it, takimi u përqendrua te situata e sigurisë në rajon dhe te angazhimi i misionit të NATO-s për ruajtjen e një mjedisi të sigurt dhe të qëndrueshëm për të gjithë qytetarët që jetojnë në Kosovë.

Gjatë bisedimeve, gjeneralmajor Ulutaş vlerësoi kontributin e Mbretërisë së Bashkuar në mision. "Gjatë takimit, gjeneralmajor Ulutaş shprehu vlerësimin e tij për kontributin e gjatë dhe të vlefshëm të Mbretërisë së Bashkuar në misionin KFOR të udhëhequr nga NATO", thuhet në njoftim.

KFOR-i theksoi se vazhdon ta zbatojë mandatin e tij në bazë të Rezolutës 1244 të Këshillit të Sigurimit të Kombeve të Bashkuara, me synim garantimin e një mjedisi të sigurt e të qetë dhe të lirisë së lëvizjes për të gjithë në Kosovë.

Në njoftim thuhet gjithashtu se misioni i NATO-s vepron në mënyrë të paanshme dhe në koordinim të ngushtë me Policinë e Kosovës dhe me Misionin e Bashkimit Evropian për Sundimin e Ligjit në Kosovë (EULEX), në përputhje me përgjegjësitë e tyre për sigurinë.