I shpëtoi ekzekutimit në Kinë, shqiptari nga Tepelena: "Jam mirë, por si në burg"

"Mos u bëni merak, jam mirë me shëndet. Më ka marrë malli për ju. Unë këtu jam mirë, por normal, si në burg. Ju mos u shqetësoni për asnjë gjë, sepse unë nuk është se kam probleme. Jam mirë". Me këto fjalë u drejtohet familjes Klaudio Kanani, shqiptari nga Tepelena që i shpëtoi dënimit me vdekje në Kinë, në një video të siguruar nga Top Channel, ku ai shfaqet për herë të parë.

Pamjet vijnë pas vendimit të Gjykatës së Apelit në provincën kineze Guangdong, e cila rrëzoi kërkesën e prokurorisë për dënimin kapital dhe la në fuqi vendimin e shkallës së parë, të dhënë në qershor të vitit 2025. Kanani mbetet kështu i dënuar me 25 vite burg.

Një zëdhënës i gjykatës, duke folur për gazetarin Muhamed Veliu, tha se vendimi i apelit i është komunikuar Kananit disa ditë më parë në qendrën e paraburgimit në Guangzhou. "Apeli ka rrëzuar kërkesën e prokurorisë për dënim kapital dhe është lënë në fuqi vendimi i qershorit 2025 në shkallën e parë, duke e dënuar me 25 vite burg, pasi ai u gjet fajtor për trafikun e një ton droge të nisur nga Hong Kongu", deklaroi zëdhënësi.

Fati i të tjerëve në të njëjtën dosje ishte shumë më i rëndë. Dy shtetas kinezë, të bashkëakuzuar me Kananin, u dënuan me ekzekutim, ndërsa për dy të tjerë u shqiptua dënimi me vdekje.

Shmangia e dënimit kapital për shqiptarin u parapri nga përpjekje diplomatike të autoriteteve në Tiranë. Ministri i atëhershëm për Evropën dhe Punët e Jashtme, Igli Hasani, zhvilloi takime me ambasadorin e Kinës në Tiranë, ndërsa në çështje u angazhuan edhe ministri i atëhershëm i Drejtësisë, Ulsi Manja, dhe ambasadori shqiptar në Kinë, Riza Poda.

Tani, me vendimin e apelit të marrë, beteja e familjes zhvendoset te transferimi. Familjarët shprehën mirënjohje për angazhimin e deritanishëm të shtetit shqiptar, por u bënë thirrje ministrit për Evropën dhe Punët e Jashtme, Ferit Hoxha, dhe ministrit të Drejtësisë, Toni Gogu, që të nisin procedurat për ta sjellë Kananin në Shqipëri, duke u mbështetur në marrëveshjen e reciprocitetit mes dy vendeve.

Vetë Kanani shpreson që shteti shqiptar të ndërmarrë hapat e nevojshëm, në mënyrë që pjesën e mbetur të dënimit ta vuajë në atdhe. Nëse procedurat do të nisin, nuk dihet ende.