Klasa bosh: 14 shkolla të Kosovës drejt mbylljes, 37 mijë nxënës më pak brenda gjashtë vjetësh

Katër shkolla në fshatrat Zhiti, Surdull, Popov dhe Lupç i Epërm të Komunës së Podujevës kanë mbetur pa nxënës të mjaftueshëm për të vazhduar mësimin dhe janë mbyllur gjatë tre viteve të fundit. Ato funksiononin me nga 8 deri në 12 nxënës. Rasti i tyre nuk është përjashtim: në nivel vendi, 14 shkolla janë drejt mbylljes për shkak të rënies së numrit të nxënësve ndër vite.

Ministria e Arsimit dhe Shkencës ka njoftuar se kërkesat kanë ardhur nga vetë komunat. "Bazuar në kërkesat e Drejtorive Komunale të Arsimit dhe në përputhje me Udhëzimin Administrativ Nr. 10/2023 për kriteret dhe procedurat e themelimit dhe pushimit të veprimtarisë së institucioneve të arsimit parauniversitar, janë shqyrtuar 14 kërkesa për ndërprerjen e veprimtarisë edukativo-arsimore të shkollave, për shkak të numrit të pamjaftueshëm të nxënësve. Për vitin 2026, deri më tani, MASH-i ka pranuar dy kërkesa nga komunat, të cilat janë në trajtim", thuhet në përgjigjen e ministrisë. Për dy kërkesat e reja ende nuk është marrë vendim.

Drejtori i Arsimit në Komunën e Podujevës, Avni Fetahu, e lidh vendimin jo vetëm me numrat, por edhe me zhvillimin e fëmijëve. "Në Komunën e Podujevës, gjatë tre viteve të fundit janë mbyllur gjithsej 4 shkolla, të cilat kanë funksionuar me një numër shumë të vogël nxënësish, nga 8 deri në 12 nxënës. Vendimi për mbylljen e tyre është marrë kryesisht për shkak të numrit shumë të ulët të nxënësve dhe me qëllim që ata të sistemohen në shkollat më të afërta, ku kanë mundësi më të mira për socializim, bashkëpunim dhe zhvillim të plotë edukativo-arsimor", ka thënë Fetahu.

Pasojat ndihen edhe te punësimi. Sipas Fetahut, këtë vit Komuna e Podujevës nuk ka hapur fare konkurs për mësimdhënës, pasi arsimtarët e shkollave të mbyllura janë sistemuar në shkollat më të afërta. Në këtë komunë, më 2026 arsimin parauniversitar po e ndjekin 2 mijë e 91 nxënës më pak sesa më 2022.

I njëjti proces po ecën edhe në Ferizaj. Drejtori i Arsimit në Komunën e Ferizajt, Afrim Llabjani, ka bërë të ditur se deri këtë vit është mbyllur një shkollë, ndërsa një tjetër është në procedurë dhe pritet të mbyllet vitin e ardhshëm. "Krahasuar me vitin shkollor 2019-2020 e deri në vitin shkollor 2025-2026, kemi rënie të numrit të nxënësve prej 2 mijë e 397 nxënësish", ka thënë Llabjani.

Shifra kombëtare tregon përmasat e dukurisë: nga viti shkollor 2019/20 deri te viti shkollor 2025/26, numri i nxënësve në Kosovë është ulur për mbi 37 mijë.