Kievi zgjohet nën tym: Rusia godet rrjetin energjetik të Ukrainës, të paktën pesë të vrarë

Kievi u zgjua i mbuluar nga një tym i dendur dhe therës, pas një nate të tërë shpërthimesh. Alarmi ajror vazhdonte ende, ndërsa në ajrin e turbullt jehonte nga larg zhurma e mbrojtjes kundërajrore. Banorëve të disa lagjeve iu kërkua t'i mbanin dritaret të mbyllura derisa tymi të shpërndahej.

Rusia ka ndërmarrë sulmin më të madh ndaj infrastrukturës energjetike të Ukrainës që nga pranvera, me objektiv kryesor kryeqytetin dhe rajonin përreth, deklaroi kryeministri ukrainas, Serhiy Koretskyi. Sipas tij, gjatë natës u sulmuan gjithsej 11 rajone të vendit dhe të paktën pesë persona humbën jetën, mes tyre një fëmijë në rajonin e Kievit. Përveç objekteve energjetike, u goditën edhe ndërtesa banimi, infrastrukturë sociale, ndërmarrje civile dhe hekurudha.

Në një deklaratë në Telegram, Koretskyi e vendosi sulmin në një kontekst më të gjerë: "Që nga vera, praktikisht nuk ka pasur asnjë ditë të vetme pa sulme të armikut ndaj infrastrukturës sonë energjetike." Dhe shtoi: "Megjithatë, një sulm masiv dhe i kombinuar i kësaj përmase ndodh për herë të parë që nga fundi i sezonit të kaluar të ngrohjes."

Bilanci i viktimave u plotësua nga autoritetet vendore. Guvernatori i rajonit të Kievit, Timur Tkachenko, bëri të ditur se trupi i fëmijës u gjet nën rrënojat e një shtëpie. Kryebashkiaku i Kievit, Vitaly Klischko, tha se në kryeqytet u vranë gjithsej tre persona, përfshirë një punonjës të një kompanie ukrainase të shërbimeve publike, i cili humbi jetën në një ndërtesë magazine. Një person tjetër u vra në rajonin e Mykolaivit, sipas guvernatorit në detyrë të atij rajoni, Heorhiy Reshetilov. Ndërkohë, guvernatori i rajonit të Sumit, Oleh Hryhorov, raportoi se të martën aty u vranë edhe dy persona të tjerë, ndërsa në një sulm të veçantë u godit një shkollë.

Objektivi më i rëndësishëm i sulmit ishte termocentrali i Trypilskës, rreth 40 kilometra nga Kievi, furnizuesi më i madh me energji elektrike i kryeqytetit. Ministria ruse e Mbrojtjes pohoi se kishte kryer goditje masive gjatë natës ndaj objekteve ukrainase dhe se termocentrali ishte ndër shënjestrat, duke pretenduar se ai furnizonte me energji objekte të mbrojtjes ukrainase. Centrenergo, kompania që operon termocentralin, konfirmoi se impianti u dëmtua nga sulmi rus dhe se po vlerëson përmasat e dëmit.

Presidenti ukrainas, Volodymyr Zelensky, tha se goditje ndaj infrastrukturës kritike pati edhe në rajonet e Zhytomyrit, Mykolaivit, Kirovohradit dhe Rivnes.

Pasojat u ndien menjëherë në shtëpitë e qytetarëve. DTEK, kompania më e madhe private energjetike në Ukrainë, njoftoi se energjia elektrike u rikthye në 8.000 banesa pas asaj që e cilësoi si "një natë e vështirë" për kryeqytetin. Megjithatë, të mërkurën disa familje në rajonet e Kievit, Dnipropetrovskut, Donetskut, Sumit dhe Harkivit vazhdonin të ishin pa energji, sipas Ministrisë ukrainase të Energjisë. Operatori shtetëror i rrjetit elektrik, Ukrenegro, u bëri thirrje banorëve të mos përdorin pajisje elektrike me fuqi të madhe nga ora 10:00 deri në 16:00 me orën vendore, pasi furnizimi ishte më i ulët se zakonisht.