Kiev nën zjarr: të paktën gjashtë të vdekur pas sulmeve ruse gjatë natës

Të paktën gjashtë njerëz humbën jetën në Kiev dhe në rajonin përreth gjatë natës nga e mërkura në të enjte, në një valë të re sulmesh ruse, sipas autoriteteve lokale ukrainase.

Në vetë kryeqytetin u vranë pesë persona dhe 23 të tjerë mbetën të plagosur, njoftoi administrata ushtarake e Kievit përmes platformës Telegram. "Pesë persona u vranë nga armiku. 23 të tjerë u plagosën", thuhet në mesazhin e administratës. Në rajonin e Brovarit, në oblastin e Kievit, humbi jetën edhe një person tjetër, sipas shefit të administratës rajonale, Tymur Tkaçenko.

Pasojat e sulmit u ndjenë në më shumë se dymbëdhjetë vende të kryeqytetit. "Në orën 3:20 u raportuan pasoja të sulmit armik në më shumë se dymbëdhjetë vende të lagjeve Darnicki, Sviatoshinski dhe Solomianski të qytetit. U dëmtuan banesa, një institucion mjekësor dhe një institucion arsimor. Shpërthyen zjarre në magazina që mbulojnë një sipërfaqe të konsiderueshme", njoftoi administrata ushtarake.

Sipas një bilanci të parë të natës, dy gra ishin vrarë dhe të paktën gjashtë persona ishin plagosur. "Në orën 01:15 dihej se gjashtë persona ishin plagosur. Fatkeqësisht, dy gra u vranë gjatë sulmit armik", njoftoi administrata ushtarake e kryeqytetit.

Kryebashkiaku i Kievit, Vitali Klliçko, përshkroi shkatërrime të rënda në një prej lagjeve. "Në lagjen Solomianski, katet e sipërme të një pallati banimi nëntëkatësh u shembën dhe shpërtheu një zjarr. Në një adresë tjetër, njerëz mbetën të bllokuar brenda një pallati banimi", tha Klliçko.

Ndërkohë, në planin politik, drejtoresha zëvendëse e kabinetit të presidentit ukrainas, Iryna Mudra, konfirmoi dorëheqjen e saj në një postim të gjatë në rrjetin X, pas hapjes së një hetimi kundër korrupsionit dhe një bastisjeje në banesën e saj. "Askush nuk më ka arrestuar", sqaroi ajo.

Mudra pohoi se ka "bashkëpunuar plotësisht" me hetuesit dhe se nuk e kundërshton të drejtën e tyre për të kryer hetimet. Ajo refuzoi të komentonte për momentin fragmente bisedash të përhapura në rrjetet sociale, duke thënë se do t'u përgjigjet akuzave pasi të njihet me dosjen.

Pjesën më të madhe të mesazhit të saj Mudra ia kushtoi mbrojtjes së punës së saj katërvjeçare për t'i kërkuar Rusisë llogari për pushtimin e Ukrainës. Ajo përmendi krijimin e një gjykate speciale për krimin e agresionit, mekanizmin ndërkombëtar për dëmshpërblimin e viktimave ukrainase dhe përpjekjet për të mobilizuar rreth 300 miliardë dollarë asete shtetërore ruse të ngrira në botë. Mudra u bëri thirrje autoriteteve që ta vazhdojnë këtë punë pavarësisht largimit të saj, veçanërisht sa i përket gjykatës speciale, dëmshpërblimeve dhe aseteve ruse.