Vuçiq: Biseda mes gjeneralit tim dhe komandantit të KFOR-it ishte më e keqja deri tani

Presidenti i Serbisë, Aleksandar Vuçiq, ka ashpërsuar retorikën ndaj misionit paqeruajtës në Kosovë, duke pohuar se shefi i Shtabit të Përgjithshëm të Ushtrisë së Serbisë, gjenerali Milan Mojsilloviq, ka zhvilluar me komandantin e KFOR-it, Ozkan Ulutash, "bisedën më të keqe" të tyre deri më tani.

Deklaratën Vuçiq e bëri kur u pyet nëse kishte folur me Mojsilloviqin pas takimit të këtij të fundit me komandantin e KFOR-it. Të hënën, presidenti serb kishte njoftuar se gjenerali do të diskutonte me Ulutashin lidhur me vendimin e KFOR-it për të reduktuar praninë e përhershme në urën kryesore mbi lumin Ibër, në Mitrovicë — vendim që tashmë ka nisur të zbatohet.

Sipas Vuçiqit, komandanti i KFOR-it i kishte thënë gjeneralit serb se Policia e Kosovës do të bashkëpunojë me misionin në ruajtjen e urës. "Mojsilloviqi ka biseduar me njerëzit e KFOR-it, me komandantin Ulutash, i cili tha: 'Nuk ka problem, Policia e ashtuquajtur e Kosovës do të punojë së bashku me ne…'", tha presidenti serb. Ai e lidhi këtë përgjigje me luftën e vitit 1999: "Vërtet, nuk ka problem? Mirë, tani e kuptojmë pse bëtë gjithçka që bëtë në vitin 1999. E kuptojmë gjithçka dhe nuk ka ndonjë filozofi të madhe, gjithçka është në rregull."

Vuçiq e cilësoi takimin si jashtëzakonisht të pakëndshëm dhe tha se Serbia tashmë e di "me kë ka të bëjë". "Thjesht ndaloni së pretenduari se jeni aty për ndonjë lloj dialogu apo për çfarëdo tjetër, sepse nuk jeni në favor të dialogut", shtoi ai.

Presidenti serb reagoi edhe ndaj vërejtjeve të Komisionit Evropian për deklaratat e tij të mëparshme lidhur me mundësinë e ndryshimit të rrjedhës së lumit Ibër. "Gjithçka u bë që ne ta përmbushnim, që ata ta përmbushnin atë obligim. Ata nuk e përmbushën dhe as që u shkon mendja ta përmbushin. Dhe thonë se nuk u shkon mendja ta bëjnë. Ndërkohë, ju u jepni gjithçka tjetër vetëm sepse dëshironi ta largoni dhe dëboni Serbinë nga Kosova", tha Vuçiq.

Tensionet burojnë nga vendimi i KFOR-it, i njoftuar të hënën, për të nisur procesin gradual të tërheqjes së pranisë së tij të përhershme nga ura kryesore mbi lumin Ibër në Mitrovicë. Në urë tashmë shihen edhe automjete të Policisë së Kosovës, në kuadër të kalimit të përgjegjësisë drejt institucioneve vendore.