Këshilltarja e Prebrezës fiton 8 mijë euro nga DKRS-ja, pastaj heq dorë nga kontrata

Tetë mijë euro nga buxheti i Komunës së Fushë-Kosovës ishin ndarë për një libër me fotografi historike nga lufta e fundit në Kosovë. Përfituese e përzgjedhur ishte Safete Berisha, këshilltarja për kulturë e kryetarit të komunës, Valon Prebreza.

Paratë u ndanë nga Drejtoria për Kulturë, Rini dhe Sport (DKRS) përmes një organizate joqeveritare. Kjo OJQ u regjistrua më 17 dhjetor 2025, vetëm 13 ditë pasi Prebreza dhe drejtuesit e tjerë të komunës u zyrtarizuan në detyrë.

Berisha pohon se paratë nuk i ka marrë. Në një deklaratë për Indeksonline, ajo tha se nuk e ka nënshkruar kontratën dhe se, pas konsultimeve, vendosi të tërhiqet pikërisht për shkak të pozitës që mban pranë kryetarit.

"Nuk e kam marrë. Nuk e kam nënshkruar, sepse edhe pse me vonesë e kam kuptuar që, meqë jam aty, nuk duhet ta marr. Kam me konkurru diku tjetër", deklaroi Berisha.

Këshilltarja pranon se ishte në këtë funksion edhe kur u bë aplikimi për projektin. Sipas saj, në atë moment nuk e kishte parë si problem, duke pasur parasysh vlerën që i jep librit. Botimi, thotë ajo, përmban materiale fotografike të fotoreporterit Ilaz Bylykbashi dhe të Behar Zogianit, ndërsa ajo vetë është kontribuuese, pasi i ka ruajtur fotografitë gjatë viteve të luftës. Libri përfshin mbi 555 fotografi dhe është në dy gjuhë.

"Është libër dokumentar i dy kontribuuesve shumë të mëdhenj të Kosovës, Ilaz Bylykbashit dhe Behar Zogianit. Nuk më ka shkuar mendja, meqë është libër shumë me vlerë për Kosovën, nuk e kam menduar ashtu. Mandej, në konsultim e sipër, e kam kuptuar dhe nuk e kam nënshkruar kontratën", tha ajo.

Për afërsinë kohore mes ardhjes së administratës së re dhe regjistrimit të OJQ-së, Berisha jep shpjegimin e saj: ideja për librin, sipas saj, kishte lindur në Prishtinë dhe procedurat për hapjen e organizatës kishin nisur para se ajo të angazhohej në Komunën e Fushë-Kosovës.

"Unë kam nisur më 1 janar te Prebreza, por procedurat për hapjen e OJQ-së kanë nisur shumë më herët. S'është ideja për ta bërë në Fushë-Kosovë. Në fakt, në Prishtinë ka qenë ideja me e botu. Mandej kam konkurruar aty", deklaroi ajo.

Berisha thekson se ndaj procesit të përzgjedhjes nuk ka pasur asnjë ankesë dhe se vendimi për t'u tërhequr erdhi pas bisedave me njërin nga autorët.

"Unë jam përzgjedhur, por unë kam hequr dorë. S'ka pasur ankesa absolutisht, por në konsultime me autorin, me njërin prej autorëve, kam vendosur mos me e botu këtu", tha ajo.

Projekti nuk është braktisur. Berisha synon që nga janari të aplikojë sërish për botimin, këtë herë në Komunën e Prishtinës ose në Ministrinë e Kulturës. Kryetari Prebreza dhe DKRS-ja nuk kanë dhënë ende ndonjë qëndrim publik për rastin.