Kërkohej nga Italia për trafik droge — arrestohet në Malësi të Madhe 32-vjeçari

Ai kërkohej prej Italisë, por u gjet pikërisht atje ku jetonte — në fshatin Kosan të Malësisë së Madhe. Policia e Shtetit njoftoi kapjen dhe arrestimin provizor, me qëllim ekstradimi drejt Italisë, të shtetasit F. B., 32 vjeç, i shpallur në kërkim ndërkombëtar nga Interpol Roma.

Sipas policisë, operacioni bën pjesë në një fazë të re të operacionit të koduar “Fast”, të përqendruar në kapjen e personave të kërkuar në nivel ndërkombëtar. Ai u zhvillua nga Sektori për Kërkimin (FAST Albania), në Drejtorinë e Forcës së Posaçme Operacionale të Departamentit të Policisë Kriminale, në bashkëpunim me Drejtorinë Vendore të Policisë Shkodër.

32-vjeçari, banues në Kosan, kërkohej pasi Gjykatësi për Hetimet Paraprake në Gjykatën e L’Aquila-s, në Itali, i kishte nxjerrë urdhër-arrestin për veprat penale “Pjesëmarrje në organizatë kriminale me qëllim trafikimin e lëndëve narkotike” dhe “Prishje e vulave të vendosura nga autoritetet”, të parashikuara nga Kodi Penal Italian.

Interpol Tirana, në bashkëpunim me Interpol Romën, vijon procedurat për ekstradimin e tij drejt Italisë.