Kërcënime ndaj alpinistëve në rrugën për Gjeravicë, kryetari i Junikut kërkon hetim

Rrugëtimi drejt Gjeravicës, një prej itinerareve më të kërkuara malore në Kosovë, është ndërprerë për një grup alpinistësh pranë zonës së "Liqenit të Zemrës". Sipas raportimeve të përcjella nga kryetari i Komunës së Junikut, Ruzhdi Shehu, ata janë penguar në vazhdimin e ecjes dhe dyshohet se u janë drejtuar fjalë të rënda dhe kërcënime nga një bari.

Shehu ka sqaruar se incidenti ka ndodhur brenda territorit administrativ të Komunës së Junikut, por që personi i përfshirë, sipas tij, nuk është banor i kësaj komune. Dyshimet ndaj tij mbeten të pakonfirmuara zyrtarisht dhe identiteti i personit nuk është bërë publik.

"Ftoj organet e rendit që ta zbardhin rastin plotësisht, pasi përgjegjësia para ligjit është gjithmonë individuale dhe nuk duhet të bëhet shkas për keqkuptime", ka deklaruar Shehu.

Kryetari i Junikut e ka lidhur reagimin e tij drejtpërdrejt me peshën ekonomike të malësisë, duke theksuar se turizmi malor është një prej shtyllave të zhvillimit ekonomik të komunës, ndërsa mikpritjen e ka cilësuar si vlerë të trashëguar ndër breza.

"Juniku ka qenë dhe mbetet gjithmonë derë e hapur për çdo dashamir të natyrës", ka thënë ai.

Në fund, Shehu u ka bërë thirrje alpinistëve të përfshirë në incident që ta vizitojnë sërish Junikun, duke i ftuar të jenë mysafirë të tij dhe të komunës. Numri i alpinistëve dhe koha e saktë e incidentit nuk janë bërë të ditura, sikurse nuk ka ndonjë reagim zyrtar të policisë për rastin.