KEK: Njësia B2 rikthehet të hënën, por mos e quani "kolaps energjetik"

Njësia B2 e Termocentralit "Kosova B" pritet të kthehet në operim mëngjesin e së hënës, më 26 tetor. Korporata Energjetike e Kosovës (KEK) e shoqëroi këtë njoftim me një reagim të ashpër ndaj atyre që ndaljen e njësisë e kanë përshkruar si "kolaps energjetik".

Sipas KEK-ut, punimet për sanimin e defektit po ecin me ritëm të përshpejtuar. Duke u nisur nga vlerësimet aktuale dhe dinamika e punës, riparimi duhet të përfundojë deri të dielën në mbrëmje. Korporata e cilëson ndaljen e njësisë si një ndalje të kontrolluar teknike, por nuk ka bërë të ditur se çfarë lloj defekti e shkaktoi atë.

Në komunikatën për media, KEK-u argumenton se defektet teknike mund të paraqiten në çdo termocentral në botë, përfshirë edhe ato me teknologji shumë më të re se kapacitetet që operojnë në Kosovë. Mbi këtë bazë, korporata hedh poshtë tonin alarmues të disa raportimeve: "Paraqitja e një ndaljeje të kontrolluar teknike si ‘kolaps energjetik’, e shoqëruar me prognoza për humbje milionëshe, pa të dhëna dhe analiza të verifikuara, nuk i kontribuon informimit të drejtë dhe objektiv të opinionit publik".

KEK-u nuk ka përmendur se kush e ka përdorur termin "kolaps energjetik" dhe kush ka paralajmëruar humbje milionëshe. Korporata thotë se e shqetëson veçanërisht fakti që narrativat alarmuese mund të relativizojnë punën e stafit të saj. Sipas saj, inxhinierët dhe profesionistët punojnë 24 orë në ditë, shtatë ditë në javë, shpesh në kushte të vështira teknike dhe operative, për të ruajtur vazhdimësinë e prodhimit të energjisë elektrike.

"Përkushtimi i punonjësve tanë meriton respekt dhe mirënjohje, jo spekulime që krijojnë shqetësim të panevojshëm te qytetarët", thuhet në komunikatë.

Korporata deklaron se mirëpret kritikat konstruktive dhe interesimin e publikut e të mediave. Megjithatë, ajo kërkon që çështjet e ndjeshme të prodhimit dhe të sigurisë energjetike të trajtohen me përgjegjësi, me profesionalizëm dhe mbi bazën e fakteve të verifikuara. KEK-u premton se publiku do të njoftohet me kohë kur njësia B2 të rikthehet në operim.