Katër të vrarë në një sulm amerikan ndaj një varke në Karaibe, bilanci shkon në 231

Një varkë në Detin e Karaibeve, një shkrepëtimë në video dhe katër njerëz të vdekur. Kështu përfundoi të shtunën sulmi i radhës i ushtrisë amerikane ndaj një mjeti lundrues që dyshohej se përdorej për kontrabandë droge.

Komanda Jugore e Shteteve të Bashkuara njoftoi se goditja u krye ndaj trafikantëve të dyshuar të drogës përgjatë rrugëve të njohura të kontrabandës, e njëjta formulë që shoqëron shumicën e njoftimeve ushtarake për sulmet në Oqeanin Paqësor lindor dhe në Detin e Karaibeve. Ushtria nuk paraqiti prova se varka po transportonte drogë. Një video e publikuar në rrjetin X shfaqte pamjen e asaj që dukej si një varkë në lëvizje, e ndjekur nga një shkrepëtimë.

Me këtë sulm, numri i personave të vrarë në goditjet ndaj varkave nga ushtria amerikane arrin të paktën 231 në 69 sulme, që nga momenti kur administrata Trump nisi para gati një viti të godasë ata që i quan "narcoterrorists" (narkoterroristë). Identiteti i katër të vrarëve të së shtunës nuk është bërë i ditur.

Fushata nuk kufizohet më te deti. Administrata amerikane po synon marrëveshje me vende aleate për ta shtrirë ofensivën edhe në tokë, në disa shtete të Amerikës Latine. Sekretari i Mbrojtjes, Pete Hegseth, tha muajin e kaluar gjatë një vizite në Panama se Kolumbia, Guatemala dhe Hondurasi kishin pranuar që Shtetet e Bashkuara të kryejnë operacione të përbashkëta ushtarake kundër grupeve kriminale në territorin e tyre. Guatemala mohoi se kishte arritur një marrëveshje të tillë. Ekuadori nisi misione të ngjashme me Shtetet e Bashkuara në mars.

Presidenti Donald Trump ka deklaruar se vendi i tij ndodhet në "armed conflict" (konflikt të armatosur) me kartelet në Amerikën Latine dhe i ka justifikuar sulmet si një përshkallëzim të domosdoshëm për të ndalur fluksin e drogës drejt Shteteve të Bashkuara dhe mbidozat fatale që po u marrin jetën amerikanëve. Administrata e tij ka ofruar pak prova në mbështetje të pretendimeve se po vret kontrabandistë.