Kapsolla e gurë mbi Bashkinë e Tiranës, studentët kërkojnë dorëheqjen e Ramës

Kapsollat dhe gurët po bien mbi godinën e Bashkisë së Tiranës. Protestuesit e kanë kthyer selinë e pushtetit vendor të kryeqytetit në shënjestër, dhe sapo nisën goditjet, punonjësit e sigurisë së bashkisë u larguan. Sulmi nuk është ndalur: hedhja e kapsollave dhe e gurëve vijon.

Tensioni është ngjitur gjatë gjithë ditës. Që në orët e mëngjesit, studentët dhe gjimnazistët bojkotuan mësimin dhe dolën në rrugët e kryeqytetit, duke iu bashkuar protestës me thirrjet "Ju erdhi fundi!" dhe "Dorëheqje!".

Kërkesa e të rinjve është e qartë: dorëheqja e kryeministrit Edi Rama dhe largimi i qeverisë. Protesta nuk është përqendruar vetëm para bashkisë, por vijon në disa zona të Tiranës, ndërsa nuk dihet ende nëse ka të lënduar apo të ndaluar.