Kapiteni i FSK-së del i pari në kursin e Green Berets në SHBA

Një kapiten i Forcës së Sigurisë së Kosovës, i identifikuar me inicialet E.V., ka përfunduar Kursin Kualifikues të Forcave Speciale të Ushtrisë Amerikane (U.S. Army Special Forces Qualification Course - SFQC) dhe është vlerësuar me titullin "Distinguished Honor Graduate", shpërblimin që u jepet të diplomuarve më të dalluar të gjeneratës.

Sipas njoftimit të FSK-së, trajnimi zgjati më shumë se tetë muaj, nga janari deri në shtator 2026, dhe u zhvillua në U.S. Army John F. Kennedy Special Warfare Center and School në Shtetet e Bashkuara të Amerikës, institucionin ku përgatiten Green Berets, forcat speciale të ushtrisë amerikane.

Programi përfshiu përgatitje të avancuar në taktikat e njësive të vogla, planifikimin dhe udhëheqjen e operacioneve speciale, kualifikimin 18A për oficer të togës së Forcave Speciale, si dhe ushtrimin përfundimtar "Robin Sage", provën e fundit që mbyll të gjithë ciklin e kualifikimit. Vlerësimi në fund të kursit, thotë FSK-ja, dëshmoi nivel të lartë të performancës profesionale, lidershipit dhe përkushtimit gjatë gjithë procesit.

"Kjo arritje përfaqëson një sukses të rëndësishëm profesional dhe njëkohësisht dëshmon përkushtimin e vazhdueshëm të FSK-së për ngritjen e kapaciteteve në fushën e operacioneve speciale, zhvillimin e kuadrove profesionale dhe avancimin e ndërveprueshmërisë me Forcat e Armatosura të Shteteve të Bashkuara të Amerikës dhe partnerët strategjikë", thuhet në njoftimin e FSK-së.

Ministria e Mbrojtjes dhe Forca e Sigurisë e Kosovës theksojnë se do të vazhdojnë të investojnë në zhvillimin profesional të pjesëtarëve përmes edukimit dhe trajnimit në institucione prestigjioze ushtarake të vendeve partnere.