Kapet pranë Hanit të Hotit me 3 emigrantë në makinë: arrestohet 44-vjeçari nga Shkodra

Një 44-vjeçar nga Shkodra u ndalua gjatë natës në rrugën nacionale pranë Pikës së Kalimit Kufitar Hani i Hotit, ndërsa në automjetin e tij ndodheshin tre shtetas të huaj me origjinë afrikane. Sipas policisë, ata synonin të kalonin ilegalisht në Mal të Zi.

I dyshuari, i identifikuar me inicialet Gj. U., banues në Shkodër, u arrestua në flagrancë. Automjeti me të cilin transportoheshin të tre të huajt u sekuestrua.

Arrestimi është pjesë e operacionit të koduar "Destinationi", të organizuar dhe finalizuar nga specialistët e Seksionit për Hetimin e Trafiqeve në Drejtorinë Vendore të Policisë Shkodër. Sipas policisë, operacioni u ngrit edhe mbi bazën e informacioneve të siguruara dhe synonte goditjen e veprimtarisë kriminale të dhënies së ndihmës shtetasve të huaj për kalim të paligjshëm të kufirit.

Tre shtetasit e huaj nuk kishin me vete dokumente identifikimi. Policia dyshon se ata kishin hyrë po ashtu në mënyrë të paligjshme në territorin e Republikës së Shqipërisë, para se të niseshin drejt kufirit verior.

Materialet procedurale për rastin iu referuan Prokurorisë për veprime të mëtejshme. Data e saktë e ndalimit nuk është bërë e ditur nga policia.