Kapet në Bolzano i dënuari nga Dibra për vrasje me thikë, i mbeten 9 vjet burg

Pas vitesh në arrati, një 28-vjeçar i lindur në Dibër, i dënuar për vrasje me paramendim, ka përfunduar në pranga në Bolzano të Italisë. Policia e Shtetit në Shqipëri e identifikon atë me inicialet V. B. dhe bën të ditur se ai është arrestuar me qëllim ekstradimi.

Kapja e tij vjen si pjesë e operacionit policor të koduar "The Wanted", që synon gjurmimin e personave të kërkuar nga drejtësia shqiptare jashtë vendit. "Finalizohet një tjetër fazë e operacionit policor të koduar ‘The Wanted’", njoftoi Policia e Shtetit.

Dosja e tij është e mbyllur në gjykatë. Në vitin 2020, Gjykata e Shkallës së Parë e Juridiksionit të Përgjithshëm Dibër e dënoi me 12 vjet burg për veprën penale "Vrasje me paramendim", kryer në bashkëpunim. Nga ky dënim, sipas policisë, atij i mbeten ende për të vuajtur 9 vjet burg. Pas vendimit, Interpol Tirana e kishte shpallur në kërkim ndërkombëtar.

Ngjarja për të cilën u dënua lidhet me një konflikt për motive të dobëta. Sipas policisë, ai, së bashku me vëllanë e tij, A. B., vrau me mjet prerës, një thikë, shtetasin A. Z., i njohur edhe si I. Z.

Tani nis beteja procedurale për kthimin e tij. Interpol Tirana, në bashkëpunim me Interpol Romën, po ndjek procedurat që i dënuari të ekstradohet drejt Shqipërisë, ku do të vuajë pjesën e mbetur të dënimit.