Kantier i bllokuar në Obiliq: Inspektorati ndalon punimet pas gjetjes së parregullsive

Punimet në një objekt ndërtimi në komunën e Obiliqit janë ndalur përkohësisht me vendim të Inspektoratit Qendror të Punës, pasi gjatë një inspektimi u evidentuan parregullsi në masat për sigurinë dhe shëndetin në punë.

Sipas Inspektoratit, në objekt nuk ishin marrë masat e nevojshme për krijimin e kushteve të sigurta për punë. Pikërisht për këtë arsye është nxjerrë vendimi për ndërprerjen e aktivitetit, i cili mbetet në fuqi deri në eliminimin e të gjitha mangësive të konstatuara.

Inspektorati u ka bërë thirrje punëdhënësve që të respektojnë standardet e sigurisë dhe shëndetit në punë, me qëllim të parandalimit të aksidenteve në vendin e punës.

Kompania që zhvillon punimet, investitori apo emri i objektit nuk janë bërë publikë, siç nuk janë dhënë as detajet mbi numrin e punëtorëve në kantier.